Deskonfia Loke Jogu Online, Polísia Halo Inspesaun Ba Kompañia Capital Venture Timor-CVT iha prédio Torre ETO

Autoridade Polísia dada fita polísia ka police line ba edifisiu Kompañia Capital Venture Timor - CVT iha prédio Torre ETO , Kuarta (10/12/2025). Imajen/Rafa.tl

DILI, RAFA.tl- Ekipa konjunta husi Polísia Nasionál Timor-Leste (PNTL), Polísia Sientifika Investigasaun Kriminál (PCIC, sigla portugés), Servisu Migrasaun ho Polísia Forensik, Kuarta (10/12/2025), tuku 15:00 Oras Timor-Leste (OTL), halo inspesaun ba kompañia Capital Venture Timor (CVT) tanba deskonfia halo atividade jogu online iha piso lima (andár 5) prédio Torre ETO, Mandarin, Dili.

Durante halo inspesaun ba atividade  kompañia CVT ne’e, autoridade Polísia  bolu kedas kompañia na’in ne’ebé ho nasionalidade Singapura hodi rekolla informasaun no dadus sira relasiona ho empreza nia atividade.

Iha inspesaun ne’e ekipa konjunta identifika kompañia CVT utiliza komputadór marka Dell 50-resin, laptop Lenovo ho LG  lubuk ida, LED ka Layar TV bo’ot rua, ho sasan  eletroniku no asesoris sira seluk tan.

Xefe Operasaun Diresaun Servisu Investigasaun Kriminál  Superintendente Asistente Polísia, Mouzinho Tavares Correia, orienta kedas membru sira dada fita polísia (police line) ba edifisiu CVT nian no sei kontinua fali inspesaun ba iha loron tuir mai, Kinta 11 fulan-Dezembru 2025 hodi hakle’an investigasaun.

CVT la’ós Empreza Grupu ETO, maibe empreza seluk ne’ebé arrenda espasu eskritóriu iha prédio Torre ETO, haktuir gerente ne’ebé gere prédio ETO liuhosi nia nota informasaun  hato’o ba públiku no meiu komunikasaun, katak atividade buska no identifikasaun ne’ebé PNTL halo iha piso lima  Torre ETO iha loron 10 fulan-Dezembru 2025, la iha relasaun ruma ho operasaun ka responsabilidade husi empreza grupu ETO.

Espasu ne’ebé PNTL halo inspesaun no buska mak espasu arrendadu ba empreza CVT – Capital Venture Timor, ne’ebé okupa andár lima (piso 5) tuir kontratu arrendamentu komersiál, hanesan empreza ne’ebé loke nia atividade ekonomika iha Timor-Leste.

ETO klarifika katak relasaun entre ETO no CVT limita estritamente ba arrendamentu espasu fiziku.

ETO la hola parte, la iha kbiit no la halo supervizaun ba atividade interna ka modelu negósiu husi empreza CVT.

Empreza grupu ETO afirma iha nota  informativu ne’e katak kualkér atividade ne’ebé la’ós tuir lei mak responsabilidade eskluziva husi CVT, no la’ós husi empreza ETO ne’ebe nain ba predio ne’e.

Lei Sívil no Rejime Arrendamentu iha Timor-Leste mós determina katak proprietáriu ka arrendadór la responde ba aktu ilísitu ne’ebé arrendatáriu halo, bainhira proprietáriu la iha partisipasaun no la iha koñesimentu sobre aktividades. Situasaun ida-ne’e aplika klaramente iha kazu atuál.

ETO apela ba públiku no meiu komunikasaun atu halo komentáriu ho prudénsia, rigor no responsabilidade, hodi evita asosiadu sala ne’ebé bele halo dano ba ETO nia reputasaun.

ETO la iha responsabilidade ruma kona-bá matéria ne’ebé agora PNTL halo hela investigasaun.

ETO reafirma mós nia disponibilidade plena atu kooperá ho autoridade kompetente sira, hanesan parte integrál husi nia komitmentu ba transparénsia, legalidade no konfiansa públika.

Reportajen ekipa Rafa.tl