CNRT ho FRETILIN Enkoraja Estudante Vítima Asédiu Seksuál iha UNTL Halo Keixa Ba MP

Imajen Ilustrasaun/Afinca

DILI, RAFA.tl– Membru Parlamentu Nasionál husi Bankada CNRT no  Bankada FRETILIN enkoraja estudante vítima asédiu seksuál iha Universidade Nasional Timor Lorosa’e (UNTL) atu hato’o keixa ba Ministériu Públiku (MP), nune’e bele halo investigasaun ba dosente ho inisiál MFB ne’ebé komete krime ne’e.

Notísia Relevante: Estudante Sira Denúnsia Dosente MFB Prátika Asédiu Seksuál

Membru PN husi Bankada CNRT nu’udár mós Prezidenti Komisaun F ne’ebé trata asuntu Saúde, Seguransa Sosiál no mós Igualidade Jéneru, Maria Gorumali Barreto iha plenaria PN, Tersa (07/10/2025), enkoraja ba estudante universitáriu ne’ebé sai vítima ba asaun asédiu seksuál bele ba halo keixa iha Polísia Nasionál Timor-Leste (PNTL), liu-liu iha Polísia Sientífika Investigasaun Kriminál (PCIC, sigla portugés), inklui Ministériu Públiku (MP).

“Ha’u husu ba alin feto sira ne’ebé mak sai vítima ba asédiu seksuál iha UNTL, se bele ba keixa iha PCIC ka bele ba iha VPU no mós ba iha Ministériu Públiku, atu nune’e, bele hato’o keisa hodi loke investigasaun ba autór abuzu seksuál iha UNTL,” Deputada Maria Gorumali Bareto hateten.

Deputada ne’e husu ba estudante sira atu labele halo deit demonstrasaun hasoru dosente ne’e tanba sei labele rezolve kazu ne’ebé estudante feto sira enfrenta, maibé presiza ba hato’o keixa, atu nune’e, bele loke investigasaun ba predator abuzu seksuál ne’ebé mai husi dosente balun.

Iha sorin seluk, Deputadu Bankada CNRT Gabriel Soares,  hatutan tán katak hanesan inan-aman no hanesan mós reprezentante povu iha Parlamentu Nasionál no membru iha Komisaun G ne’ebé tutela bá área edukasaun fó solidariza bá oan feto sira ne’ebé sai  vítima ba asédiu seksuál iha UNTL.

“Ha’u solidariza tebe-tebes ho ha’u nia oan estudante sira. Ita nia oan sira mai atu eskola la’ós mai fó aan bá predatór seksuál sira ne’ebé maka laiha moral, atu hetan de’it valor ida tenke negosia ho ema nia dignidade, ne’e grave. Modelu hanesan ne’e atu halakon morál iha ita-nia rai,”  Deputadu Gabriel Soares hateten.

Iha sorin seluk, Deputada husi Bankada FRETILIN, Lídia Norberta Martins, hateten nu’udár mós feto husi Bankada partidu FRETILIN  hato’o solidariedade ba vítima nia aten brani hodi halo denúnsia ba problema ne’ebé sira infrenta.

“Ami mós enkoraza ba feto maluk sira ne’ebé mak durante ne’e sai vítima la’ós bá predatór ida, maibé bá predatór sira seluk atu labele nonok bá ida,” Deputada Lidia Norberta Martins tenik.

Nia hatutan nu’udár feto  tenke haree asuntu ida-ne’e no ema hotu tenke haree, tenke luta ba ida-ne’e, nune’e labele haree de’it ba ema ida maibé tenke haree bá ema hotu-hotu liuliu iha mós ministériu sira tanba akontese hotu.

Vise-Ministru Asuntu Parlamentár Adérito da Costa Hugo hateten, tinan barak ona eziste pratika sira hanesan ne’e, tán ne’e apresia tebes bá aestudante  feto sira ne’ebé maka brani ko’alia sai para bele halo prevensaun no atuasaun ba autór sira ne’ebé maka komete iha atividade sira hanesan ne’e.

“Kampus universitáriu nu’udár espasu ne’ebé garante estudante sira nia atividade estudu, liuliu ba estudante feto sira, lamentavél tebes dosente sira maka komete aktu sira hanesan ne’e, no mensajen ida forte tebes husi akontesimentu ida-ne’e maka ba dosente hotu no iha universidade no eskola sira  atu atensaun no prosesu tenke la’o halo investigasaun,” Vise-Ministru Asuntu Parlamentár Adérito Hugo hateten.

Hosi sorin seluk Reitór UNTL, João Soares Martins deklara katak, nia parte aprezenta ona relatóriu ida ba Konsellu Disiplinár UNTL nian atu bele toma medida ba problema ne’ebé mak iha.

“La’ós desizaun, lae, maibé buat hotu sei mai ho nia prosesu,  ha’u simu ona relatóriu husi dekanu, no mós família estudante ida ba hasoru ha’u, horseik,” João Soares Martins informa.

Nia afirma universidade iha Konsellu Displinar, entaun horiseik kedas, 06 fulan-Outubru, tinan ne’e,   enkamina relatóriu ne’ebé simu husi dekanu no mós ezijensia ka informsaun ne’ebé hetan husi família.

Reitór ne’e subliña, universidade iha Konsellu displinar maka sei tetu sasan sira ne’e, para foti medidas.

Reportajen ekipa Rafa.tl