Autoridade Timor-Leste Investiga Hela Insidente Fronteira Rezulta Sidadaun Indonézia Ida Mate

Autoridade sira Indonézia nian halo hela identifikasaun ba insidente sidadaun Indonézia ida mate iha área fronteira terrestre Timor-Leste, Domingu (17/08/2025). Imajen/Espesiál

DILI, RAFA.tl—Autoridade Polísia Timor-Leste nian buka hatene halo kle’an ka investiga daudaun insidente ne’ebé akontese iha fronteira terrestre parte Suai-Covalima nian ne’ebé rezulta sidadaun indonézia na’in-ida lakon vida ka mate.

Informasaun ne’ebé Rafa.tl asesu katak vitíma nu’udár abitante Aldeia Manleten, Suku Tasifeto Leste, Belu, Timor Osidentál, ho inisiál ATB (tinan 33), koñesidu mós ho naran Abel alegadamente hetan tiru no mate iha área fronteira terrestre Suai, Munisípiu Covalima, Domingu (17/08/2025).

Insidenti ka akontesimentu ne’e hahú bainhira vítima ho nia maluk na’in-20 tama iha teritóriu Timor-Leste hodi buka ka kasa balada fuik.

Hale’u tuku 11:00 kalan, oras indonézia nain, vitíma nia maluk ida rona kilat tarutu dala-sia ne’ebé akompaña ho hakilar iha lian materna. Nune’e, vítima nia maluk sira halai, maibe vítima la fila no  iha loron tuir mai, sira hetan vítima  ho kondisaun iis laiha ona.

Portavós Polísia Nasionál Timor-Leste (PNTL), Superintendente Polísia João Belo dos Reis, Kinta (21/08/2025), hateten   PNTL liuhosi Diresaun Servisu Investigasaun Kriminál Nasionál (DSIKN)  hamutuk ho ekipa investigasaun husi Polísia Munisípiu Covalima  hala’o dadaun servisu identifíka poténsia sira kontribui ba risku krimi ida ne’e.

“Ita nia ekipa sira iha terrenu hala’o hela servisu hodi identifika hodi buka hatene kauza husi insidente ne’e,” Superintendente Polísia João Belo dos Reis ba jornalista sira iha salaun Ministériu Interiór (MI), Dili.

Informasaun prelimináriu husi autoridade seguransa Timor-Leste nian katak inísiu kazu ne’e akontese bainhira vítima ho nia maluk sira grupu kasadór sira  tama iha teritóriu Timor-Leste hodi kasa animál fuik  depois mate iha área Timor-Leste.

“Sidadaun ne’e mate iha ita-nia rai-laran (área jurídiku), ne’e indísiu ita iha, depois identifikasaun mate tanba kauza saída mak nia mate, kauza saída ne’e prosesu identifikasaun sei la’o hela,”  Superintendente Polísia João Belo dos Reis hateten.

Tenke iha Investigasaun Kle’an

Hosi sorin seluk, membru Komisaun B Parlamentu Nasionál  ne’ebé trata asuntu Negosiu Estránjeiru no Defeza, Natalino dos Santos, husu  tenke iha investigasaun kle’an bá sidadaun ida ne’ebé mate iha área fronteira Timor-Leste nian .

Deputadu Natalino dos Santos hateten,  nu’udár umanu triste, maibé seidauk hatene sidadaun Indonézia ne’e mate kauza husi saída katak mate tanba oho ka tanba violénsia.

“Ita alerta para bele fó solusaun bá problema ne’e, sé akontese iha ita-nia rai fronteira Timor, ha’u husu bá Polisia Siéntifiku Investigasaun Kriminal (PSIK), atu halo investigasaun kle’an para bele fó hatene motivu mate ne’e tanba saída,” Deputadu  Natalino dos Santos bá jornalista sira iha PN.

Natalino dos Santos, nu’udár mós membru Konselleru Servisu  Nasionál Intelejénsi (SNI) ne’e informa sira-nia parte kordena keda, no husu informasaun iha bazé bá membru sira ne’ebé destakadu iha fronteira no sira informa katak to’o agora sei halo hela identifikasaun bá sidadaun Indonézia ne’ebé mate ho motivu husi  mate ne’e tanba saída.

Iha fatin hanesan membru PN husi Bankada FRETILIN, David Dias Ximenes “Mandati” hateten, tenke hatene tuir mate ne’e oinsá, deskonfia katak ema ruma maka oho ne’e,  bele deskonfia mais tenke investiga no labele deskonfia de’it kondena uluk ona ne’e labele.

“Tenke liuhosi invetigasaun ruma para hetan verasidade faktu, ema bele deskonfia dehan katak ita-nia ema sira iha fronteira halo seguransa maka tiru karik, mós ha’u labele dehan ida-ne’e, tanba seidauk investiga loloos sé maka autór bá situasaun ida-ne’e. Husik investigasaun la’o para hatudu faktu sé maka sai autór bá insidente ne’e,” Deputadu  David “Mandati” hateten.

Membru Komisaun B PN ne’e mós husu atu autoridade sira iha fronteria koopera malu, atu nune’e, bele respeita ema nia vida, tanba vida ne’e Maromak maka fó no Maromak maka bele foti fali.

Reportajen Ekipa Rafa.tl