AFC ASEAN Cup 2027, João Pedro ho Mouzinho de Lima iha Esperansa Manán Maldivas

Estrela jogadór Selesaun Nasionál Timor-Leste, Mouzinho de Lima ho João Pedro hamutuk ho ekipa selesaun nasionál hala'o treinu fiziku no tátika iha Kampo FFTL atu enfrenta jogu kontra Maldivas iha 31 Marsu 2026, taça AFC ASEAN Cup 2027. Imajen/Rafa.tl

DÍLI, RAFA.tl- Estrela jogadór Selesaun Nasionál Timor-Leste, João Pedro ho Mouzinho de Lima iha esperansa, no kompromete lori vitória no fó orgullu ba Timor hodi manán  Maldivas iha ronde datoluk jogu kualifikasaun AFC ASEAN Cup 2027 iha Arábia Saudita.

Tuir oráriu ne’ebé públika katak Timor-Leste sei joga hasoru Maldivas iha jogu AFC ASEAN Cup Arábia Saudita 2027 iha loron 31 fulan-Marsu 2026. Ho nune’e, ekipa selesaun nasionál halo ezersisiu maka’ás ho preparasaun ho di’ak, liu husi treinamentu no junta ho jogadór Timoroan sira husi diaspora, hanesan João Pedro, Mouzinho de Lima ho Gali Freitas.

Jogadór Selesaun Nasionál, João Pedro ba Rafa.tl iha kampo Federasaun Futeból Timor-Leste (FFTL), Sesta (20/03/2026), konfirma nia parte hamutuk ho ekipa sempre iha motivasaun husi treinadór José Pedro Alves Salzar, hodi hala’o preparasaun no hakarak halakon Maldivas iha jogu kualifikasaun ne’e.

“Ita nia  ekipa prepara ho di’ak ona, ha’u mós junta ho ekipa loron-rua ka loron-tolu liubá, ha’u sente katak preparasaun ba Maldives nian ne’e iha jogadór balu mak seidauk mai junta, mas iha esperansa no hakarak hatudu jogu ne’ebé di’ak hodi manán jogu ne’e,” João Pedro afirma.

Iha fatin hanesan, jogadór Mouzinho de Lima, otimista  halakon Maldivas tanba  iha ona esperénsia antes katak Selesaun Nasional Timor-Leste halakon ona Maldivas iha jogu primeiru kualifikasaun ASEAN CUP.

“Ami prepara kuaze semana tolu ona, ha’u sente preparasaun  másimu ona tanba hamutuk ho jogadór sira agora, ita hatene katak jogadór sira ne’ebé joga iha rai-li’ur mai hotu ona no preparasaun durante ne’e hamutuk ho treinadór mós kapas tebes, ha’u dézde inisiu kedas hamutuk ho ekipa. Ami sente preparadu atu joga kontra Maldivas,” Mouzinho de Lima hateten.

Ekipa Selesaun  Nasionál hala’o ona preparasaun liu husi treinamentu ne’ebé hala’o iha kampo FFTL durante semana rua, ne’ebé foku ba tátika inklui halo defensivu, nune’e bele infrenta jogu kontra Maldivas.

Iha jogu kualifikasaun AFC ASEAN Cup 2027 iha ronde datoluk ne’e, Timor-Leste  iha grupu A ne’ebé hamutuk ho Tajikistan, Maldivas no Filipina. Selesaun Nasionál sei aranka iha loron 28 fulan-Marsu ne’e, no joga kontra ekipa Selesaun  Nasional Maldivas iha 31 fulan-Marsu ne’e.

Reportajen ekipa Rafa.tl