A.D S.L.B Laulara Konkista Vitória Hafoin Halakon Maudoko F.C ho Skor 2-1

Ekipa A.D S.L.B Laulara selebra vitória hafoin halakon sira-nia adversáriu Maudoko F.C ho Skor 2-1, Domingu (15/03/2026). Imajen/Rafa.tl

DÍLI, RAFA.tl– Ekipa A.D S.L.B Laulara konkista vitória ne’ebé importante hodi mantein iha segunda klasifikasaun Liga Timorense Futeból Femenino hafoin halakon Maudoko F.C ho skor 2-1.

Ekipa A.D S.L.B Laulara iha oportunidade atu kudeta tabela klasifikasaun Liga Timorense Futeból Femenino, tanba oras ne’e, ekipa Makikit Laulara rekolla pontu 42 no diferente pontu rua husi Ekipa S’amuser F.C ne’ebé lidera tabela klasifikasaun ho pontu 44.

Iha jogu kontinuasaun Liga Femenino ne’ebé hala’o iha Kampu Federasaun Futeból Timor-Leste (FFTL), Domingu (15/03/2026), ekipa A.D S.L.B Laulara ho Maudoko F.C hasa’e kedas intensidade jogu hodi halo presaun no kontra atake ba malu.

Ekipa Maudoko F.C iha uluk oportunidade atu marka golu ba  nia adversáriu A.D S.L.B Laulara liu husi oportunidade ne’ebé iha, maibé sei falla iha ezekusaun.

A.D S.L.B Laulara kontinua halo jogu ida ho kalma no hadi’a fallansu sira ne’ebé iha hodi tenta halo golu, maibé ekipa adversáriu mós mantein kalma no balansu ba jogu.

Maudoko F.C ho agressividade ne’ebé iha konsege marka uluk golu ida iha minutu 35 liu husi jogadora Sónia Lopes dos Santos aproveita bola falta hodi muda skor ba 1-0.

Ekipa A.D S.L.B Laulara mantein ho tátika ne’ebé iha no hahú halo tranzisaun ba liña jogadora sira hodi kontinua halo atake ba adversáriu, no ikus mai konsege halo empata liu husi jogadora Milénia Saldanha iha minutu 40.

To’o primeira parte termina ekipa rua laiha ida mak marka tan golu, nune’e empata 1-1.

Tama ba segunda parte, ekipa A.D S.L.B Laulara hahú hasa’e liután sira nia intensidade jogu no lansa atake, maibé Maudoko F.C mantein sólidu no halo balansu ba jogu.

Ekipa rua kontinua halo mudansa ba liña jogadora no mudansa ba tátika, inklui halo substituisaun, maibé skor iha tabela sei mantein.

A.D S.L.B Laulara kontinua halo substituisaun no Maudoko F.C mós hanesan ho ambisaun hakarak manán jogu ne’e.

Sorte di’ak monu ba A.D S.L.B Laulara iha minutu 84, jogadora Elvira da Silva ne’ebé hetan oportunidade di’ak hodi marka no muda skor ba 2-1. Golu ne’e mak lori esperansa ba A.D S.L.B Laulara hodi mantein iha segunda klasifikasaun tabela Liga Femenino.

To’o jogu termina, ekipa rua mantein ho skor ne’ebé iha, no A.D S.L.B Laulara rekolla pontu tolu importante no iha oportunidade kudeta tabela klasifikasaun no hadau títulu kampiaun ba époka ne’e.

Reportajen ekipa Rafa.tl