Desporto

FDP 2026 Sei Hahú Kompetisaun Atletismu, Tenis ho Xadres

todayNovember 18, 2026 25

Background
share close

Díli, 18 Novembru 2026 (RAFA) –Ministeriu Juventude, Desportu, Arte no Kultura (MJDAK) fó ona apoiu orsamentu ba atividade jogu kompetisaun Festivál Nasionál Desportu ho montante US$587,319.70.

Dadaun ne’e MJDAK hamutuk ho Komite Paralímpiku Nasionál Timor-Leste (CPNTL)  inklui Konfederasaun Desportu Timor-Leste (CDTL) no Prezidente Autoridade Munisípiu  Díli sei realiza Festival Desportu Paralímpiku (FDP) 2026 ho modalidade tolu, Atletismu, Tenis  Meza, no Xadres iha fulan-Novembru ne’e.

Prezidente Komité Paralímpiku Nasionál Timor-Leste, Mateus Lukas, ba RAFA iha nia knaar-fatin CDTL informa katak ekipa organizadora halo ona preparasaun atu asegura programa sira bele lao ho diak.

“Kona-bá paralímpiku  modalidade tolu deit, hahú ohin loron halo enkontru tékniku ba modalidade Atletismu nia ne’ebé iha loron rua no tolu tan mak sei halo kompetisaun ba Paralimpiku nian,” Mateus Lukas subliña.

Nia afirma, komisaun deside atu hahú uluk kompetisaun ba modalidade tolu ne’ebé prepara ona, tanba númeru atleta ne’ebé partisipa limitadu, no sei realiza abertura jerál depois de atividade kompetisaun hahú.

Tuir rekizitu ne’ebé komisaun determina, maibe atleta balu ne’ebé rejista la konsege kumpre rekezitu partisipasaun, tanba ne’e, komisaun deside atu la inklui atleta sira ne’ebé la kumpre rekizitu.

“Iha nia rekizitu ne’e tenke iha munisípiu hotu, inklui RAEOA no Ataúro. Maibe, iha modalidade ita mensiona iha paralímpiku nia lolos ne’e modalidade neen ka hitu mak partisipa,” tenik Mateus Lukas.

Prezidente CPNTL ne’e dehan  agora dadaun atleta sira iha munisípiu organiza husi Prezidente Autoridade Munisípiu idaidak, maibé barak laiha koñesementu kona-bá paralímpiku nian. Entaun, difisiensia husi munisípiu barak mak la rezista, balu rezistu duni maibe la tama iha rekzitu.

Festival Desportu Paralímpiku sei hala’o serimónia abertura iha fulan-Novembru ne’e, maibé seidauk iha desizaun definitivu kona-bá data no oráriu exatu ba abertura ofisiál, no komisaun sei determina no informa kona-bá programa abertura tuir preparasaun no koordenasaun ne’ebé hala’o hela.

Ba fatin hala’o kompetisaun, modalidade ténis meza sei uza instalasaun desportiva iha Madre Canossiana, Xadrez hala’o iha Jináziu Díli, no atletismu sei disputa iha Estádiu Munisipál Díli.

Fatin sira-ne’e sei sai sede ba kompetisaun tuir modalidade ida-idak, hodi fasilita implementasaun atividade Festival Nasionál Desportu Paralimpiku.

Jornalista: Marito da Costa

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!