Ouvir RAFA Ritmo, Voz e Coração de Timor
Lisboa, 6 Novembru 2026 (RAFA) – Cristiano Ronaldo anunsia katak nia sei remata definitivamente nia kestaun hanesan reprezentante Seleksaun Nasionál Portugal, depois dedika an ba seleksaun durante tinan 23.
Durante períodu ne’e, Cristiano Ronaldo rejista ona partisipasaun iha jogu hamutuk 234 no marka golu 146, ne’ebé sai rekor mundiál. Desizaun ne’e, ne’ebé kleur ona ema espera, hamosu reasaun oioin hosi mundu desportu to’o polítika.
Kapitaun seleksaun ne’ebé agora tinan 41 ne’e hato’o nia desizaun iha quinta-feira kalan, ne’ebé hanesan dadeer ohin iha Díli, liuhosi vídeo ho durasaun besik minutu lima ne’ebé publika iha rede sosiál. Vídeo ne’e akompaña ho mensajen hakerek no múzika ho títulu “O Amor a Portugal” (Domin ba Portugal).
Anúnsia ne’e mosu iha loron ida antes Jorge Jesus atu fó sai lista jogadór sira ne’ebé sei konvoka ba jogu ikus iha kompetisaun Liga das Nações, hasoru Dinamarca no País de Gales.
“Iha loron ida-ne’e, ha’u fo fila fali kamizola númeru sete ba povu Portugal, kamizola ne’ebé reprezenta ita hotu”, Ronaldo hahú nia mensajen.
“Ne’e la’ós desizaun ne’ebé fasil atu foti, tanba iha desizaun balu ne’ebé la’ós foti de’it ho hanoin, maibé mós ho sentimentu. Agora remata ona dalan naruk ida ne’ebé hahú iha fulan Agostu 2003 no muda ha’u-nia moris ba nafatin”, nia hakerek.
Bainhira haree fila fali ba tempu uluk, Ronaldo hateten katak nia la haree de’it rezultadu no susesu sira, maibé nia hanoin mós ba ema sira ne’ebé nia hasoru durante nia processu sira hotu.
“Ha’u haree ema sira. Ha’u hanoin ba migrante sira ne’ebé durante minutu 90, bainhira haree jogu, sente katak Portugal besik liu ba sira”, nia hateten.
“Ha’u mós halo sala, ha’u mós sofre, no iha momentu balu ha’u la konsege fó ba povu Portugal buat ne’ebé sira hakarak tebes. Maibé ha’u nunka desiste”, nia afirma.
Nia kontinua haktuir: “Golu sira sei liu, troféu sira sei hela iha museu, no rekor sira ikusmai sei iha ema seluk ne’ebé sei supera. Maibé, se ha’u konsege halo imi kontente, entaun buat hotu ne’e iha folin.”
Iha mensajen ne’e, Ronaldo mós hato’o nia agradese ba kolega sira iha seleksaun.
“Ha’u hetan priviléjiu atu sai imi-nia kapitaun. Maibé, kapitaun ida labele la’o mesak.”
Nia mós agradese ba ema hotu ne’ebé servisu hamutuk ho nia durante nia iha seleksaun, no ba nia família, ne’ebé sempre fó apoiu.
“Se ha’u konsege to’o iha ne’ebé ha’u to’o agora, ne’e tanba ita sempre hamutuk no kaer liman”, nia hateten.
“Laiha klube, laiha kór, laiha klase sosiál, laiha profisaun no laiha opiniaun ne’ebé bele fahe ita. Iha de’it paixão ida: Portugal.”
Ronaldo afirma katak nia vitória boot liu mak “hetan onra atu reprezenta nasaun ne’ebé di’ak liu iha mundu”, no nia hatudu orgullu boot tanba hetan oportunidade atu uza camisola Portugal ho númeru sete.
“Portugal sei hela nafatin iha ha’u-nia fuan. To’o ikus, Cristiano Ronaldo.”
Kontestu desizaun no relasaun ho treinadór
Desizaun Ronaldo atu sai hosi seleksaun ne’e mai depois de iha loron 30 Setembru, iha véspera jogu hasoru Dinamarca, nia sai hosi kampu treinu seleksaun iha inísiu períodu treinamentu ho treinadór Jorge Jesus.
Federasaun Futeból Portugal (FPF) aplika suspensaun durante loron 30 ba Ronaldo, ne’ebé nia kumpre ona.
Iha komunikadu ne’ebé publika iha 6 Outubru, Ronaldo hato’o nia versaun kona-ba akontesimentu ne’e, maski treinadór seleksaun seidauk konfirma deklarasaun hirak-ne’e.
Ronaldo hateten katak Jorge Jesus la kumpre liafuan ne’ebé nia fó durante jogu iha Noruega. Iha jogu ne’e, Ronaldo sai atu halo aquecimento durante jogu, maibé ikusmai la tama atu joga.
Tanba situasaun ne’e, Ronaldo deside “abandona kampu treinu seleksaun, laiha tan hein atu akontese violasaun ba liafuan seluk”.
Tuir informasaun hosi jornál A Bola, Ronaldo informa ona prezidente FPF, Pedro Proença, kona-ba nia desizaun, maibé nia la ko’alia diretamente ho Jorge Jesus.
Reasaun hosi lideransa no instituisaun Portugal
Prezidente Repúblika Portugal, António José Seguro, fó reasaun iha momentu rua.
Iha mensajen ida, nia hateten: “Ho naran Portugal, ha’u agradese ba Cristiano Ronaldo tanba maneira ne’ebé nia reprezenta Selesaun Nasionál. Ha’u bele imajina katak ida-ne’e mak loron ida ne’ebé todan liu iha nia vida desportiva. Ha’u mós hatene katak Portugal sei kontinua konta ho nia domin ba nasaun.”
Iha Madrid, iha okaziaun Símpsiu Ibero-Amerikanu dala 30, António José Seguro aumenta tan nia deklarasaun:
“Nia taka ona nia dalan hanesan jogadór iha seleksaun, maibé ha’u iha serteza katak nia la taka nia dedikasaun no domin ba Portugal. Deseju buat di’ak hotu ba ita, Cristiano. No agradese barak.”
Treinadór Jorge Jesus, iha entrevista ho televizaun Canal 11, hateten katak:
“Buat hotu ne’e nia desizaun rasik. Ami iha oportunidade atu ko’alia kona-ba asuntu ne’e antes konvokasaun dahuluk. Ha’u husu ba nia atu kontinua servisu hamutuk ho ha’u, tanba ha’u presiza nia atu hela besik ha’u. Maibé, ha’u tenke respeita nia desizaun.”
Prezidente FPF, Pedro Proença, hakerek katak Ronaldo sei sai ba Portugal liu duké jogadór ida de’it.
Nia deskreve Ronaldo hanesan “mane, atleta, figura referénsia, erói no lider. Ita-nia Kapitaun”.
Pedro Proença mós afirma katak “odamatan Federasaun Futeból Portugal sei nakloke nafatin ba Cristiano Ronaldo”.
FPF mós hato’o vontade forte no boot atu organiza serimónia despedida ne’ebé merese no tuir nivel karreira desportiva Ronaldo nian.
Primeiru-Ministru Portugal, Luís Montenegro, hakerek: “Buat ne’ebé ita halo iha kampu ba Portugal sei hela nafatin iha istória ba tempu naruk. No agora, maski iha kampu liur, ita sei kontinua reprezenta Portugal iha mundu.”
Prezidente uluk Portugal, Marcelo Rebelo de Sousa, mós afirma katak: “Cristiano Ronaldo mak jogadór boot liu no di’ak liu hosi Portugal, Europa no mundu, iha tempu uluk no agora.”
Reasaun hosi FIFA, UEFA no klube sira
Prezidente FIFA, Gianni Infantino, hato’o nia apresiasaun ba karreira Ronaldo, ne’ebé nia deskreve hanesan karreira ida ne’ebé marka ho talentu extraordináriu no determinasaun ne’ebé la lakon.
Nia mós subliña katak Ronaldo-nia eransa boot liu la limita de’it ba rekor, troféu no golu sira.
Gianni Infantino taka nia mensajen ho liafuan: “Agradese barak, Cristiano, tanba paixão no momentu memorável sira ne’ebé ita fó ba ami.”
FIFA mós fó hanoin ba faktu istóriku ida, katak: “Jogadór ida de’it mak konsege marka golu iha kampionatu mundiál futeból neen. Jogadór ne’e mak Cristiano Ronaldo.”
UEFA mós publika mensajen simples maibé signifikativu: “Agradese, Cristiano Ronaldo.”
Klube Al Nassr, ne’ebé agora Ronaldo joga ba, afirma katak sei iha istória tan atu hakerek hamutuk ho jogadór Portugal ne’e.
Manchester United, klube ida ne’ebé Ronaldo servisu ba durante nia karreira, hato’o apresiasaun ba nia “karreira internasionál ne’ebé extraordinária”. Juventus mós fó valor ba “dalan extraordináriu” ne’ebé Ronaldo hala’o iha servisu ba Portugal.
Enkuantu ne’e, Premier League publika mensajen: “Ami iha oportunidade atu fahe palcu ho lejenda ida.”
Reasaun hosi jogadór no figura futeból internasionál
Antigu kolega Ronaldo iha Manchester United, Rio Ferdinand, hakerek mensajen badak maibé ho signifikadu boot:
“Ne’e hanesan filme ida, maun.”
Jogadór Marroku, Achraf Hakimi, deskreve Ronaldo hanesan “lejenda ida ne’ebé sei hela nafatin iha istória futeból”.
Antigu jogadór futeból brasilleiru, Romário, mós afirma katak Ronaldo “merese fatin espesiál ida iha galeria jogadór boot liu sira iha istória futeból mundiál”.
Karreira istórika ho Seleksaun Portugal
Cristiano Ronaldo halo nia estreia iha Selesaun Nasionál sénior Portugal iha fulan Agostu 2003, bainhira nia iha idade tinan 18. Jogu ne’e mak jogu amistozu hasoru Cazaquistão, iha Chaves, durante períodu treinadór Luiz Felipe Scolari.
Durante nia karreira ho seleksaun, Ronaldo hetan títulu importante sira, inklui:
Nia mós partisipa iha Kampionatu Mundiál Futeból dala neen, inklui edisaun ikus ne’ebé hala’o iha tinan ida-ne’e.
Jogu ikus Ronaldo ho Seleksaun Portugal mak vitória 1-0 hasoru País de Gales, iha loron 24 Setembru, iha Estádiu Alvalade.
Ho partisipasaun hamutuk iha jogu 234 no golu 146, Cristiano Ronaldo taka nia kapitulu ida istóriku iha Seleksaun Portugal, depois de tinan 23 dedikasaun, susesu no kontribuisaun ba futeból nasionál no internasionál.
Jornalista: António Sampaio
Written by: RafaFM
Cristiano Ronaldo Despede Seleksaun Portugal
todayNovember 20, 2026 7 3
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt