Desporto

Aproveita Janela Transferénsia, Maudoko F.C Rekruta Jogador Na’in-Haat

todayNovember 6, 2026 68 5

Background
share close

Díli, 06 Novembru 2026 (RAFA) – Klubu promovidu Maudoko F.C aproveita janela transferénsia Liga Futsal Timor-Leste Primeira Divizaun hodi hametin plantel ho rekrutamentu jogador foun na’in-haat.

Jogador rekrutadu atu reforsa ekipa Maudoko F.C ne’e kompostu husi jogador  lokál na’in-rua no estranjeiru na’in-rua.

Treinadór Maudoko F.C, Marcel Moc  hateten sira-nia klubu laiha intensaun atu halo transformasaun boot ba plantel, maibé prefere mantein maioria jogador ne’ebé iha ona no halo ajustamentu de’it ba pozisaun ne’ebé presiza reforsa. Maudoko F.C iha ona jogadór na’in-rua ne’ebé sai husi ekipa, inklui Abdi Neraga Ali Umar (GK) no Reynaldi Feonay (Angkor), ne’ebé fila ba Indonézia. Tanba ne’e, klubu presiza buka jogador foun atu substitui.

“Jogador estranjeiru ida mai husi Lombok no ida seluk husi Blacksteel,” hatete Marcel Moc ba RAFA iha Díli, Sesta-ne´e.

Ba jogadór lokál, Zenivio Liranco Gamboa Fernandes Tavares sei okupa pozisaun guarda-redes (GK), tanba antes ne’e Maudoko iha guarda-rede ida de’it. Enkuantu Roberto Verdial, ne’ebé joga iha pozisaun flank karuk, fila fali ba Maudoko depois antes joga ba Ramelau.

Jogador estranjeiru, Gani Gunawan, ne’ebé sai hanesan eis-jogadór Mauputar F.C no Maudoko F.C, sei joga iha pozisaun flank. Enkuantu Piter Marcelino, ne’ebé mai husi Blacksteel, sei okupa pozisaun pivot.

Marcel Moc subliña katak pozisaun pivot sai prioridade ida iha prosesu rekrutamentu, tanba iha momentu atuál Maudoko iha Bayu Bagas, ne’ebé mai husi Solo, hanesan opsaun ida de’it ba pozisaun ne’e.

Aleinde ne’e, iha pakote segundu, ekipa seidauk iha pivot no falta opsaun iha flank karuk.

“Ami presiza tan jogadór pivot ida atu halo balansu iha pakote primeru no segundu. Iha pakote segundu ami seidauk iha pivot, no ba flank karuk mós durante ne’e uza jogadór ida de’it, ne’ebé halo ami susar atu halo rotasaun,” nia hatutan.

Ho reforsu foun sira ne’e, Maudoko F.C espera atu hadi’a prestasaun no aumenta kompetitividade hodi luta maka’as ba bilhete ba fase final four Liga Futsal Timor-Leste Primeira Divizaun.

Iha kompetisaun époka 2026, liga tama ona iha jornada dahitu. Maudoko F.C atualmente okupa pozisaun lima ho pontu 13, depois disputa jogu hitu, ho rezultadu manan haat, empate ida no derrota rua.

 Jornalista: Davilio Valdamir/Marito da Costa

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!