Desporto

Liga Voleibol, Ekipa Mane Choque Manan K-Link 3–2

todayOctober 30, 2026 15

Background
share close

Díli, 30 Outubru 2026 (RAFA) – Ekipa voleibol mane Choque konsege manan mihis nia adversáriu K-Link ho rezultadu 3–2.

Iha kompetisaun Liga Voleibol Timor-Leste Primeira Divizaun époka 2026 ne’ebé hala’o iha Jimnáziu Desportivu Díli (GDD), Kinta-ne’e, hahú set dahuluk, ekipa Choque tama ho kombinasaun jogadór lokál no estranjeiru, enkuantu jogadór estranjeiru rua, Dany no Ricky Aditya, hahú hosi bankada rezerva. Enkuantu ekipa K-Link mós hatama kedas jogadór estranjeiru rua, Roja Risqi no Gilbert Kadafuk, atu hametin forsa ekipa.

Iha set dahuluk, ekipa rua hatudu kompetisaun ne’ebé ekilibrada, ho troka atake liuhusi smesh no bloku forte. Maibé, Choque konsege aproveita oportunidade sira no kontrola jogu hodi manan set dahuluk ho rezultadu 25–17.

Iha set daruak, Choque hatama nia arma prinsipál rua, Dany no Ricky Aditya, ne’ebé prezensa sira aumenta intensidade jogu no halo kompetisaun sai manas liután. Ekipa rua kontinua troka atake no bloku forte, maibé K-Link konsege responde di’ak no manan set daruak ho rezultadu apertadu 26–24, hodi halo rezultadu jerál sai 1–1.

Kontinua ba set datoluk, K-Link hatudu performanse ne’ebé di’ak liu, liuhusi atake efetivu no organizasaun jogu ne’ebé metin. Ho esforsu ne’e, K-Link konsege manan set datoluk ho rezultadu 25–19, hodi muda vantagem ba rezultadu jerál 2–1.

Iha set da-haat, Choque la hakarak husik adversáriu kontinua iha vantagem. Ekipa ne’e hametin fali nia jogu, aumenta presizaun iha atake no defende ho di’ak, hodi konsege manan set ne’e no halo rezultadu jerál sai ekilibradu 2–2. Rezultadu ne’e obriga ekipa rua atu disputa set ikus nu’udar determinasaun ba vitória.

Iha set da-lima, ne’ebé sai set desizivu, Choque hatudu konsentrasaun no determinasaun aas atu asegura vitória. Ho servisu ekipa ne’ebé di’ak no atake efetivu, Choque konsege domina disputa no manan set ikus ho rezultadu 15–9.

Ho rezultadu finál 3–2, Choque konsege supera K-Link iha batalla intensa ne’e, depois  ekipa rua fahe vitória iha set sira antes to’o ba set desizivu.

Jornalista: Davilio Valdamir/ Marito da Costa

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!