Kuda Ulun F.C Halo Supreza Halakon Mushila F.C 3-2

Kuda Ulun F.C susesu halo supreza hafoin halakon ekipa kampeaun Liga Futsal époka 2025 Mushila F.C ho score 3-2. Imajen/LFTL

Díli, 23 Outubru 2026 (RAFA) -Ekipa promovidu Kuda Ulun F.C susesu halo supreza  hafoin halakon ekipa kampeaun Liga Futsal époka 2025 Mushila F.C ho score 3-2, iha jogu kontinuasaun Liga Futsal Timor-Leste primeira divizaun jornada dahitu ne’ebé hala’o iha Kampu Futsal F-FDTL, Díli, Kinta-ne’e.

Ekipa rua ne’e tun kedas ho intensidade aas dezde inisiu kick – off  jogu primeira parte tanba hetan suporta másimu husi adeptu sira. Maibé tama ba minutu 18  jogadór João Paulo husi Mushila F.C produs golu ida ba gurda rede Kuda Ulun F.C hodi lori nia ekipa lidera provizoriu ho 1-0.

Ho golu ne’e obriga ekipa rua jogu ho ofensivu liután hodi lansa kontra no atake ba malu. Kuda Ulun F. C koko muda tatika jogu atu halo empata. Maibé, atake hirak ne’e la to’o nia alvu score nafatin 1-0 to’o termina jogu primeira parte.

Tama ba segunda parte, jogu sai manas liután ba ekipa rua ne’e hodi lansa kontra-atake ba malu. Maibé, iha minutu 25  Mushila F.C  aproveita espasu hatama tan golu liu husi Evinho Guterres aumenta score ba 2-0.

Ekipa Kuda Ulun F.C  halo esforsu  ne’ebé konsege konkista rezulatadu pozitivu iha minutu 26 liu husi asaun jogadór Alamsya Ahmad hodi hamihis score sai ba 2-1.

Liu deit minutu balun,  Kuda Ulun F.C  muda ritmu jogu aumenta tan golu ba guarda rede Mushila F.C iha minutu 31 liu husi jogadór Jefanio Sarmento hodi muda kuadru score sai ba 2-2.

Iha minutu 33,  ekipa Kuda Ulun F.C  halo supreza produs tan golu ida haf’in aproveita sutu bola  kontra atake ho lais hodi muda aumenta score sai 3-2  mantein to’o taka jogu segunda parte.

Jornalisa: David Gonçalves/Domingos Bere