Xanana Promete Kompetisaun Desportiva Ba Ema Ho Defisiénsia

PM Xanana Gusmão hato’o iha nia diskursu iha anseramentu Tasa Rotativa Avó Nana 2026 iha Estádiu Munisipál Díli, Domingu 27 Setembru 2026.

Díli, 27 Setembru 2026 (RAFA)- Primeiru-Ministru Kay Rala Xanana Gusmão,  promete realiza kompetisaun desportiva espesífiku ba ema ho defisiénsia iha tinan oin.

“Tinan oin, ha’u hanoin hela atu halo Tasa ida ba ema defisiénsia, la barak, mais barak, lahanesan hotu, balu labele ko’alia, balu labele rona, balu la’o la di’ak,” PM Xanana hato’o iha nia diskursu Final Tasa Rotativa Avó Nana 2026 iha estadiu Munisipál Díli Domingu-ne’e.

Xanana Gusmão hateten kompetisaun ne’e sei fó oportunidade ba ema ho defisiénsia atu partisipa iha atividade desportiva ho modalidade sira ne’ebé adapta tuir kapasidade no nesesidade partisipante sira.

Nia hatutan, kompetisaun ne’e la’ós de’it iha modalidade futeból, maibé bele envolve modalidade desportiva oioin, hanesan badminton, ténis, halai no desportu seluk.

Xefe ezekutivu ne’e mós  hato’o nia apresiasaun ba komisaun organizadóra, klubu, espetadór no patrosinador sira ne’ebé kontribui ba susesu realizasaun Tasa Avó Nana 2026.

Tuir Xanana, kontribuisaun husi parte sira ne’e la’ós de’it importante ba identifikasaun talentu no jogador foun. Maibé mós ajuda halibur juventude liu husi atividade desportiva.

Jornalista: Marito da Costa/Fidelino de Araújo