São Francisco Xavier Manan Ramelau F.C 4-1 iha Jornada Datoluk LFTL

São Francisco Xavier F.C vs Ramelau F.C iha Kampu Futsal F-FDTL, Díli, Domingu 27 Setembru 2026. Imajen/LFTL

Díli, 28 Setembru 2026 (RAFA)- Ekipa São Francisco Xavier manan nia adversáriu Ramelau F.C ho score 4-1 iha jogu jornada datoluk Liga Futsal Timor-Leste (LFTL), époka 2026 ne´ebé hala’o iha Kampu Futsal FALINTIL-Forsa Defeza Timor-Leste (F-FDTL) iha Díli, Domingu-ne´e.

Iha jogu primeira parte, São Francisco Xavier hatudu dominasaun no konsege marka golu tolu.

Jogadór Lourenço Oliveira sai jogadór ne’ebé marka golu rua, ida-idak iha minutu neen no minutu hitu.

Depois, Dircio de Araújo aumenta vantajen São Francisco Xavier ba 3-0 iha minutu 14. Rezultadu ne’e mantein to’o árbitru fó sinal atu remata primeiru parte.

Iha segunda parte, Ramelau F.C buka atu redus diferensa no João Guterres konsege hamihis rezultadu sai 3-1 iha minutu 22.

São Francisco Xavier kontinua halo presaun no hatudu jogu ida agresivu. Nune’e iha minute 38,  Adroaldo Martins marka tan golu ida hodi muda score ba 4-1. Rezultadu ne´e lori vitória ba ekipa São Francisco Xavier .

Ekipa Ramelau F.C ne´ebé hanesan kampiaun Liga Futsal Timor-Leste époka kotuk (2025) kontinua hela iha zona degradasaun hafoin durante jogu tolu rekolla deit pontu ida, hafoin empata Ida no derota dala rua.

São Francisco Xavier sae ba pozisaun da-lima ho pontu neen husi jogu tolu; manan rua no empata ida.

 Jornalista:  Davilio Valdamir/ Domingus Bere