Liga Futsal Timor-Leste, AD Estrella Baguia Halakon F.C Coelho 6-2

AD Estrela Baguia manan F.C Coelho ho rezultadu 6-2 iha jornada da-tolu Liga Futsal Timor-Leste, Kinta 24 Setembru 2026.

Díli, 25 Setembru 2026, (RAFA)— AD Estrela Baguia kontinua lidera tabela klasifikasaun Liga Futsal Timor-Leste hafoin manan F.C Coelho ho rezultadu 6-2 iha jornada da-tolu ne’ebe hala’o iha Kampu Futsal FALINTIL-Forsa Defeza Timor-Leste (F-FDTL), Díli, Kinta-ne’e.

Duelo entre ekipa jigante rua ne’e hahú ho intensidade aas, desde inisiu no Estrela Baguia konsege loke konta golu iha minutu hitu (7), liu husi Ilham Rahmadan, ne’ebé aproveita suta livre hodi halo score 1-0.

Ho golu ne’e halo ekipa Estrela Baguia domina liu jogu, ho nune’e, tama ba iha minutu 14, kapitáun ekipa Estrela Baguia, Zaquiel Sanches, marka golu ida hodi aumenta vantajen sai 2-0.

Sofre ona golu rua, F.C Coelho tenta hodi aplika sistema power play, maibé desizaun ne’e loke espasu ba Estrela Baguia atu aumenta tan golu.

Liu husi gurada rede Fernando da Costa marka golu iha minutu 15, no minutu ida tuir mai, Muhammad Akran aumenta score sai 4-0.

Antes remata primeira parte, F.C Coelho konsege hamihis diferensa liu husi jogador António da Silva iha minutu 19, hodi taka primeira parte ho score 4-1.

Kontinua ba jogu segunda parte, Estrela Baguia Mantein domina jogu. Ruben Faria aumenta tan golu, hodi halo score sai 5-1.

No tama ba iha minutu 33 F.C Coelho responde ho golu ida tan, hodi hamihis score sai 5-2. Maibé Estrela Baguia la para. Miguel Fernandes marka aumenta Tan golu ida iha minutu 33, hodi taka segunda parte ho score 6-2.

rezulatadu vitoria ne’e hatuur metin ekipa Estrela Baguia iha pozisaun dahuluk ho pontus sia husi jogu tolu manan hotu.

Jornalista: Davilio Valdamir/ Fidelino Araújo