Jogu Abertura FIFA ASEAN Cup 2026, Timor-Leste Sofre Hasoru Myanmar 0-2

Imajen/reprodusaun

Díli, 25 Setembru 2026 (RAFA) – Jogu abertura FIFA  ASEAN Cup 2026, Kinta-ne’e, Timor – Leste sofre derrota hasoru  Myanmar ho rezultad ikus 0-2.

Iha jogu ne’ebé hala’o iha Mong Kok Stadium, Hong Kong,  ekipa selesaun nasionál Myanmar hahú partida ho dominasaun no presáun aas, no konsege loke konta iha minutu 18. Atakante Win Naing Tun aproveita situasaun husi bola kantu no remata ho diak hodi lori Myanmar lidera 1–0.

Ho sofre golu ne’e, Timor-Leste buka resposta no hahú kria oportunidade balu. Iha minutu 24, Joao Pedro hetan oportunidade rua hodi remata maka’ás ba baliza Myanmar. Maibé, guarda-redes  konsege defende, nune’e primeira parte remata, ekipa Myanmar  lidera 1–0.

Tama ba segunda parte, Myanmar kontinua kontrola ritmu partida no aumenta vantajen iha minutu 74.  Jogador Than Paing aproveita bola kruza, no konsege marka golu daruak, hodi muda rezultadu ba 2–0.

Timor-Leste la desiste no buka hamenus diferensa. Iha minutu 76, Vabio Canavaro lori bola tama ba área penalti Myanmar no remata maka’ás, maibé guarda-rede Myanmar konsege defende no hasai bola husi área perigu. Timor-Leste kontinua esforsu, mais to’o apitu final rezultadu la muda. Myanmar sai vensedór ho score 2–0.

Rezultadu ne’e sai derrota dahuluk ba Timor-Leste iha grupu B FIFA ASEAN Cup 2026. Ba partida tuir mai, Timor-Leste sei enfrenta Cambodia iha Kai Tak Stadium, Hong Kong, China, iha 30 Setembru 2026.

Jornalista: Marito da Costa