AFTL Sei Fa’an Billete Ba Adeptu Sira iha Liga Futsal Timor-Leste

Adeptu Liga Futsal Timor-Leste epoka 2026.

Díli, 21 Setembru 2026 (RAFA)- Ezekutivu Asosiasaun Futsal Timor-Leste (AFTL) hahú implementa sistema fa’an billete ba adeptu sira ne´ebé hakarak asiste direita sira nia ekipa favoritu joga iha liga futsal ba époka ne´e.

Prezidente AFTL, Antoninho Junior Guterres Ximenes, ba RAFA, Domingu-ne´e,  hatete, medida ne’e antes nunka aplika tanba kondisaun infraestrutura, liuliu falta kadeira no fasilidade sira iha kampu, maibé ba époka ida-ne’e, AFTL hetan apoiu kadeira husi empreza Rotomor, tanba ne´e AFTL aplika fa’an billete ho presu US$2.00 ba apoiante sira ne’ebé tuur iha kadeira iha parte oin, no US$1.00 ba sira ne’ebé hamriik iha parte kotuk.

Ho presu ne’e, adeptus hadomi futsal sira bele asiste jogu rua iha loron ida ho kustu ne’ebé konsidera razoável.

“Agora ita aplika uluk ba laran, depois ita hanoin katak ema hotu ne’ebé mai partisipa no asiste jogu tenke sosa billete. Parte laran, ha´u sente klaru ona tanba iha odamatan. Ba parte liur seidauk iha odamatan, tanba ne’e ami sei ko’alia ho Sekretáriu-Jerál no komisaun atu kombina solusaun,” Prezidente AFTL Antoninho Junior Guterres Ximenes informa.

AFTL mós informa katak kapasidade kadeira iha parte laran kuaze 300, enkuantu parte li’ur bele simu ema entre  na’in-50 to’o na’in- 70 e ho total kapasidade kuaze 350 espetadór, depende ba kondisaun no organizasaun klubu sira.

Sistema ne’e mós iha objetivu atu kria fonte reseita ida ne’ebé bele ajuda operasaun Liga Futsal. Reseita husi faan billete sei ko’alia no koordena ho klubu sira, tanba klubu mós sei hetan benefísiu husi reseita billete.

Liga Futsal Timor-Leste normalmente hala’o jogu rua iha kada loron, enkuantu iha fin de semana bele to’o jogu tolu.

Kona-bá aplikasaun sistema billete ba Segunda Divizaun, AFTL seidauk foti desizaun final, tanba kompetisaun agora foin hahú ho Primeira Divizaun.

Jornalista: Davilio Valdamir/ Mario Fili