Liga Futsal Timor-Leste, F.C Coelho Manan Mushila F.C 3-2

F.C Coelho

Díli, 20 Setembru 2026 (RAFA)- Jogadór Denilson dos Santos susesu sai erói ba nia ekipa hodi lori F.C Coelho rekolla pontu tolu no manan nia adversáriu Mushila F.C ho score 3-2.

Iiha jogu kontinuasaun Liga Futsal Timor-Leste primeira divizaun jornada daruak ne’ebé hala’o iha Kampu Futsal FALINTIL-Forsa Defeza Timor-Leste (F-FDTL), Díli, Domingu-ne’e, ekipa jigante rua ne’e inísiu kedas hatudu jogu ho ritmu kontra atake ba malu.  Maibé  F.C Coelho domina kedas bola, ho nune’e, jogu foin hala’o minutu ida F.C Coelho konsege lidera ona ho score 1-0 liu husi jogador Denilson dos Santos.

La para ho ida ne’e liu de’it minutu ida rede Mushila F.C nakdoko hikas hafoin Aristides Pires marka nia naran hodi muda scora ba 2-0.

Sofre ona golu rua, Mushila F.C kontinua buka dalan atu responde. No tama ba iha minutu 12, situasaun sai todan ba F.C Coelho, tanba tenke kontinua joga ho jogadór na’in-haat, hafoin kapitaun ekipa, Rivaldo Pereira, hetan kartaun mean.

Menus jogadór ida Mushila F.C halo tentativa oioin hodi buka oportunidade atu hamihis golu maibé too termina jogu primeira parte ekipa F.C Coelho mantein lidera ho score 2-0.

Tama ba iha minutu 33 Mushila F.C ne’ebé mak sofre Uluk golu rua Iha primeira parte tenta halo jogu power play hodi fo presaun makas ba F.C Coelho maibé ekippa Coelho aproveita hodi lansa tan golu ida hodi haboot liu tan score sai 3-0 liu husi Denilson dos Santos.

Mushila F.C nafatin mantein ho jogu power play no hodi buka oportundade atu marka golu no Tama ba minutu 34, João Paulo Canizo aproveita oportunidade hodi marka ida ba nia ekipa Mushila F.C no hamenus diferensa, halo rezultadu sai 1-3.

Tama ba minutu 37, Mushila F.C kontinua fó presaun liu husi jogu power play. Randy Mistuni aproveita oportunidade no marka tan golu ida ba Mushila F.C, hamenus diferensa liután, hodi halo rezultadu sai 3-2.

Ho score refere ekipa rua mantein lansa kontra atake ba malu maibé too termina jogu segunda parte score mantein 3-2 no vitória ba F.C Coelho.

Jornalista : Davilio Valdamir