B’TAL F.C Rekolla Pontu Tolu iha Jogu Dahuluk Liga Futsal ho Vitória 9–1 Hasoru AS Jerman

Jogadór sira B’TAL F.C selebra vitória hafoin halakon nia adversáriu AS Jerman ho score 9-1 iha jogu dahuluk iha Liga Futsal Timor-Leste époka 2026, Kinta-kalan 17 Setembru 2026.

Díli, 17 Setembru 2026 (RAFA) – B’TAL F.C hahú sira nia jogu dahuluk iha Liga Futsal Timor-Leste époka 2026, rekolla pontu tolu hafoin halakon AS Jerman ho score 9–1.

Iha jogu dahuluk ne’ebé hala’o iha Kampu Futsal Kuartel-Jenerál FALINTIL–Forças de Defesa de Timor-Leste (F-FDTL) iha Díli, Kinta-ne’e, ekipa rua hatudu intensidade jogu  aas no agresivu hodi buka oportunidade atu marka golu.

B’TAL F.C sai ekipa ne’ebé  produtivu, no konsege koleta uluk golu iha minutu haat, liu husi jogadór estranjeiru Alfiano Bidaya, hodi lori B’TAL FC lidera 1–0.

Jogu kontinua ho ritmu aas, tanba  B’TAL FC aumenta tan nia vantajen iha minutu ualu, jogadór Syafri Abdullah marka nia golu rua, antes nia kompañeiru Dwi Wadu aumenta tan golu ida, hodi muda rezultadu sai 4–0.

Liu de’it minutu ida, iha minutu sia, B’TAL F.C marka tan golu liuhosi Grebaldo da Silva, hodi aumenta vantajen ba 5–0.

Maski kuda hela iha situasaun difísil, AS Jerman tenta halo kontra-atake lalais hodi buka golu. Maibé, ekipa B’TAL F.C organiza jogu ho disiplina, nune’e AS Jerman la konsege aproveita oportunidade sira ne’ebé hetan.

B’TAL F.C kontinua domina partida no aumenta tan vantajen iha minutu 14, bainhira Gelvanio Maggut  marka golu hodi lori nia ekipa aumenta score ba 6–0. Rezultadu ne’e mantein to’o primeira parte remata.

Tama ba segunda parte, B’TAL F.C nafatin domina jogu no halo ameasa ba baliza AS Jerman. Iha minutu 21, Dwi Wadu marka tan nia golu, hodi muda rezultadu sai 7–0.

B’TAL FC aumenta tan presaun no iha minutu 24 konsege marka golu, liuhusi Julio Alves, hodi muda rezultadu ba 8–0.

AS Jerman kontinua buka dalan atu responde no iha minutu 33 konsege hetan golu ida liuhusi Domiber Soares, hodi reduz derrota ba 8–1.

B’TAL F.C la para no kontinua ataka. Iha minutu 36, jogadór Honorio Maia marka golu ikus ba B’TAL F.C hodi taka rezultadu ikus sai ba 9–1.

Rezultadu 9–1 ne’e lori B’TAL F.C hetan pontu tolu (3) iha nia jogu dahuluk no, bazeia ba rezultadu ne’ebé disponivel, tau ekipa ne’e iha lideransa provizóriu tabela klasifikasaun Liga Futsal Timor-Leste 2026.

Jornalista: Marito da Costa