AD Estrela Baguia Hahú Liga Futsal ho Espetákulu 7–3 Husi Saralima F.C

Jogu AD Estrela Baguia vs Saralima F.C, Kuarta-kalan, 16 Setembru 2026.

Díli, 16 Setembru 2026 (RAFA) – AD Estrela Baguia konkista vitória ho rezultadu 7–3 ba jogu dahuluk kontra Saralima FC, iha jogu Primeira Divizaun Liga Futsal Timor-Leste 2026, ne’ebé hala’o iha Kampu Futsal Kuartel Jenerál FALINTIL-Forças de Defesa de Timor-Leste (F-FDTL), Díli, Kuarta-ne’e.

Estrela Baguia domina jogu dezde inísiu no konsege konkista golu dahuluk iha minutu hitu liuhosi Ruben Faria. Alende ne’e, golu husi Benditu Ramos no Zaquel Santos iha minutu 12, aumenta vantagem ba 3–0, antes jogador Miguel Lay hatama golu ba-dahat iha minutu 13.

Antes termina jogu primera parte, jogadór Fajo Maya aumenta rezultadu ba 5–0 iha minutu 16, hafoin ekipa Saralima responde liuhosi Juliao Ximenes iha minutu 17, maibé Zeri Migato hatama golu ba Estrela Baguia iha minutu 19, hodi taka primeira parte ho rezultadu 6–1.

Iha segunda parte, estrela Baguia aumenta tan vantajen liuhosi Zaquel Sanches iha minutu 22, hodi muda kuandru score ba 7–1.

Saralima konsege responde liuhosi Nelson Ximenes, ne’ebé hatama golu rua iha minutu 23, maibé to’o jogu remata, Estrela Baguia nafatin lidera ho rezultadu 7–3.

Ho vitória ne’e, AD Estrela Baguia lidera tabela klasifikasaun provizóriu ho pontu tolu (3), no vantagem produtividade golu kompara ho Coelho FC, ne’ebé mós hetan vitória ho rezultadu 5–1 kontra São Francisco Xavier (SFX).

Jornalista: Marito da Costa