Abertura Liga Futsal Timor-Leste Époka 2026, Ramelau F.C Fahe Pontu Hanesan Ho Mushila F.C

Abertura Liga Futsal Timor-Leste époka 2026, Segunda 14 Setembru 2026.

Díli, 14 Setembru 2026 (RAFA)- Liga Futsal Timor-Leste époka ne’e hahú hikas ho animu, paixaun no orgullu. Ekipa jigante Ramelau F.C ne’ebé hanesan kampiaun Liga époka kotuk hatudu nia kualidade hodi fahe pontu hanesan ho adversáriu Mushila F.C iha jogu abertura ne’ebé hala’o iha Kampu Futsal Kuartel Jerál FALINTIL-Forsa Defeza Timor-Leste (F-FDTL), Fatuhada, Díli, segunda-ne’e.

Ekipa Kampiaun Liga Futsal Ramelau F.C tenke simu rezultadu ho pontu hanesan hafoin iha 40 minutus empata ho score 2-2 ho adversáriu Mushila F.C.

Desde inisiu jogu Mushila F.C ne’ebé tun ho jogadór esperiente hanesan Joel Fernandes, João Paulo Canizo, Evinho Guterres, Rivaldo Faria no Ikhwan domina kedas jogu ho ofensivu ho ritmu ne’ebé makas maibé ekipa Ramelau F.C halo jogu ida nakonu ho disiplina no defensivu ho solidu hodi la fo fatin ba ekipa Mushila F.C atu marka golu.

Jogu tama ba minutu 11 Mushila F.C marka uluk golu ida liu husi jogadór Randy Mistuni hodi muda score ba 1-0.

Ho golu refere tensi jogu komesa manas liutan ba ekipa zigante Rua ne’e atu lansa kontra atake ba malu no tama ba minutu minutu 17 Ramelau F.C konsege halo supreza hodi marka golu ba rede Mushila F.C ne’ebé mak hein husi gurada rede Ikhwan hodi muda score ba 1-1 to’o jogu priemeira parte termina.

Tama ba segunda parte, Ramelau F.C, ne’ebé kontinua manteín nia formasaun ho jogadór nasionál sira no talentu foin-sa’e, konsege halo supreza hodi fura uluk rede Mushila F.C no muda score ba 2-1, liuhusi golu João Guterres iha minutu 25.

Hafoin golu ne’e no Ramelau F.C lidera provizoriu halo ekipa rua nia jogu aumenta manas liután,  no Mushila F.C kontinua lansa atake ba Ramelau F.C maibé ekipa rua kontinua iha balansu too minutu 30-resin.

Tama ba minutu 35 Mushila F.C konsege marka golu ida liu husi jogadór Joel Fernandes hodi muda score ba 2-2 hodi salva Mushila F.C husi derota no asegura pontu ida ba nia ekipa.

Ekipa rua kontinua iha balansu ba jogu iha minutu lima ikus nune’e too jogu termina laiha ekipa ida mak aumenta tan golu no ekipa rua tenke fahe pontu hanesan ho score ikus 2-2.

Entertantu, iha jogu abertura ne’e hetan partisipasaun másimu husi autoridade sira, Ezekutivu Orgaun Liga Futsal Timor-Leste, klubu sira primeira no segunda divizaun, adeptus sira no mós amante futsal sira hotu.

Jornalista: Davilio Valdamir/ Fidelino Araújo