Jogadór 23 Tama Lista Konvokatóriu Ba FIFA ASEAN CUP 2026

Treinadór Selesaun Nasionál Timor-Leste anúnsiu  ona jogadór na’in-23 ne'ebe tama lista konvokatóriu hodi partispa Torneiu FIFA ASEAN CUP 2026.

Díli, 10 Setembru 2026 (RAFA)— Treinadór Selesaun Nasionál Timor-Leste anúnsiu  ona jogadór na’in-23 ne’ebe tama lista konvokatóriu hodi partispa Torneiu FIFA ASEAN CUP 2026 ne’ebe sei halao iha Hongkong  iha loron 24 fulan-Setembru-ne’e.

Liuhosi Konfrénsia Imprensa,  Kuarta-ne’e, iha Federasaun Futebol Timor-Leste (FFTL), Treinadór Selesaun Nasionál Timor-Leste, José Pedro Salazar ba jornalista sira hatete, selesaun ne’ebé nia halo kahor ho jogadór timoroan iha diaspora ho jogadór iha rai-laran.

“Ba jogadór timoroan kompete hela iha rai-li’ur, hau sempre akompaña identifika sira-nia klubu joga iha fin de semana, maske jogadór lokal la kompete mais haré ba sira nia talentu, maizu menus junta buat rua ne’e mak ita foti desizaun hodi tau sira iha lista ekipa nasional,” José Pedro afirma.

Treinadór ne’e mós rekonese iha lista referénsia la inklui jogadór di’ak balu, hanesan Mário Quintão no Angenku. Maibe, desizaun kona-bá lista final bazeia liu-liu ba kondisaun no ritmu kompetisaun jogadór sira nian.

“Haré ba lista ida ne’e, ha’u hakarak ba torneiu ida ba jogadór ne’ebe mak kompete hela. Entaun, jogadór hirak ne’e iha Timor la kompete tanba liga paradu, ne’e duni ha’u tenke haré ba ida ne’ebé kompete hanesan Paulo Gali Freitas, João Pedro tanba ne’e tenke solesiona didia’k to’o ikus ita avansa ho ida-ne’e,” treinadár selesaun nasionál ne’e hateten.

Koordenadór Selesaun Nasionál Timor-Leste, José Fonseca informa katak FFTL halo ona komunikasaun ba klubu sira ne’ebé iha jogadór Timor-Leste atualmente joga iha rai-li’ur, atu sira bele liberta jogadór sira ba konvokasaun selesaun nasionál.

“Kona-bá komunikasaun entre jogadór sira ne’ebé mak tama iha lista, sira nia klubu fó ona autorizasaun, data konvokatoriu ne’ebé iha ona, nune’e sira sei junta ho ekipa tuir data ne’ebé mak iha, ” José Fonseca haktuir

Nia hatutan hafoin konvokasaun jogadór, selesaun nasionál sei hala’o preparasaun no treinamentu iha Hong Kong iha loron 15  fulan-Setembru ne’e.

Timor-Leste Presiza Vitória

Diretór Servisu Selesaun Nasionál FFTL, João Maneco, konsidera FIFA ASEAN Cup 2026 nu’udar torneiu importante ba Selesaun Nasionál Timor-Leste, liuliu atu buka rezultadu di’ak ne’ebé bele ajuda hasa’e pozisaun Timor-Leste iha ranking FIFA.

João Maneco hatete jogu sira iha FIFA ASEAN Cup importante no Timor-Leste presiza buka rezultadu di’ak atu hadi’a reputasaun no pozisaun iha ranking FIFA.

“Jogu ida ne’e jogu importante, tanba liga ho ita-nia ranking. Ita presiza rezultadu ne’ebé di’ak hodi bele hasa’e ita-nia ranking ba leten,” João Maneco hateten.

Nia mós haktuir atualmente Timor-Leste okupa pozisaun 201 iha ranking FIFA, tanba ne’e, Selesaun Nasionál presiza halo esforsu másimu iha FIFA ASEAN Cup 2026 atu hetan vitória no oportunidade atu hasa’e pozisaun ba leten.

Treinadór Selesaun Nasional Timor-Leste, José Pedro Salazar relata katak ba FIFA ASEAN Cup, nia sei konsidera sistema 3-4-3 no 4-3-3, maibé eskema no jogador sira sei determina tuir análize no estratéjia atu hasoru kada adversáriu.

“Ami haree katak sistema rua ne’e bele sai sistema importante ba ami. Tuir forma ami prepara ekipa, husi jogador na’in-23 ne’ebé ami hili ba torneiu ida-ne’e, ami konsidera sira nu’udar jogador sira ne’ebé iha kondisaun di’ak no apropriadu liu ba estratéjia ne’ebé ami sei uza,” José Pedro Salazar afirma.

Iha FIFA ASEAN Cup 2026, Timor-Leste tama iha Grupu B, hamutuk ho Kamboja no Myanmar.

Iha jogu dahuluk, Timor-Leste sei enfrenta Myanmar, loron  24 Setembru 2026 iha Mong Kok Stádiu, Hong Kong.

Tuir orariu jogu FIFA ASEAN CUP 2026 Timor Leste Tama iha grup B hamutuk ho Kamboja no Myanmar.

Lista Konvokatória Timor-Leste

Dylan Jose Nisqi – Western City Rangers (Austrália), Egidio L. C. X. de Oliveira – Karketu Dili FC, Alexandre O. Lima Quintao – Sta. Cruz FC, João M. de J. Varudo Afonso – AD Bobadelense (Portugal), Eric Tomas Tam Silva – CD Sesimbra (Portugal), Jakson M. P. Fowler – Valentine FC (Austrália), Ryan Harris Jom – Canterbury Bankstown (Austrália), Anizo Correia – AD Santo António FC, Juvito Moniz – Sta. Cruz FC, Luis Figo P. Ribeiro – AD Santo António FC, Liam F. Farrugia – Naxxar Lions FC (Malta), Santiago X. J. da Costa – Karketu Dili FC, Claudio Gomes Osorio – Elvas SAD (Portugal).

Tristan Xavi Arrarte – Western Sydney Wanderers FC (Austrália), Palomito A. C. Ribeiro – AD Santo António FC, Vabio Cannavaro – Kamen Podbablje (Kroasia), Oatnasio da Silva Guterres – Portadown FC (Northern Ireland), Zion Plinio D. Bessie Cruz – Free Agent (Austrália), Alexandro B. Corsino Lemos – Karketu Dili FC, Olagar F. Malik Xavier – AD Santo António FC, Paulo D. Gali da C. Freitas – Madura United (Indonézia), Zenivio M. Gostavo C. Mota – UM Damansara United (Malázia), Joao Pedro da S. Freitas – Kuching FC (Malázia)

Jornalista: Marito da Costa