FTTL Prepara Atleta Taekwondo Na’in-Rua Kompete Asian Indoor Martial Games

Ajersisiu atleta sira modalidade Taekwondo.

Díli , 02 Setembru  2026 (RAFA)– Atleta na’in-rua ne’ebé selesiona husi Federasaun Taekwondo Timor-Leste (FTTL) preparadu ba kompete eventu internasionál Asian Indoor Martial Games iha Saude Arabia.

Modalidade Taekwondo ne’ebé pasa ona selesaun, atleta Septiana Fernandes Joaquim  ho Teofilio Marques sei partisipa eventu ne’e tuir oráriu  hala’o iha fulan-Dezembru, tinan ne’e.

Treinadór ekipa selesaun nasionál Taekwondo Timor-Leste, Claudio Joaquim Mousaco Galucho, hateten atleta sira preparadu hodi compete tanba atleta sira halo preparasaun husi kedas inisiu fulan-Janeiru to’o agora .

“Atleta ne’ebe atu ba partisipa iha eventu ne’e iha atleta feto ida no mane ida , ne’ebe ohin loron sira mós halo hela preparasaun hanesan fiziku no tékniku,” Claudio Joaquim Mousaco Galucho informa ba RAFA iha nia knar fatin, Kuarta-ne’e.

Atleta na’in-rua ne’e sei kompete iha kategoria klasse senior nian, ho diferente hanesan atleta feto sei kompete kategoria klasse kilograma  46  no atleta mane sei kompete iha kategoria klasse  kilograma 54.

Treinadór ne’e  haktuir  eventu internasionál ne’e, atelta na’in-rua sei kompete  ho atleta sira husi nasaun  44 . Tuir ajenda  atleta modalidade Taekwondo sei aranka loron 11 fulan-Dezembru no fila iha  loron 22 fulan-Dezembru tinan ne’e.

Jornalista :David Gonçalves