FIFA Kompromete Harii Estádiu Padraun Internasionál Iha Tasi-Tolu Ba Timoroan sira

Ekipa FIFA ho FFTL halo vizita ba Estádiu Munisipál Díli, Sábadu 22 Agostu 2026.

Díli, 23 Agostu 2026 (RAFA)— Fédération Internationale de Football Association (FIFA) kompromete harii estádiu padraun internasionál ba Timoroan sira iha Timor-Leste.

Planu ba terrenu konstrusaun estádiu ho padraun internasionál ne’e hetan ona konkordansia ofisiál husi Governu liuhosi Sekrétariu  Estadu Terras no Propriedades  iha  loron 21 fulan-Agostu-ne’e, ne’ebé define fatin ba konstrusaun iha Tasi-Tolu iha Altar  Misa Pontifikál Papa Francisco nia kotuk.

Daudaun ne’e Diresaun Infra-estrutura Federasaun Futébol Timor-Leste (FFTL) buka meius hodi  halo dialógu ho komunidade sira ne’ebé afetadu ba progresu konstrusaun ba estádiu foun  ne’ebé nia fundu totál  mai husi FIFA no AFC.

Xefe Assosiasaun Membru Servisu Finansa FIFA, Christoph Suppiger informa,  Sábadu ne’e, iha Díli, konfirma katak kona -bá projetu  konstrusaun ba estádiu padraun internasoionál nia prosesu la’o hela, tanba FIFA no Governu hala’o  hela kolaborasaun, liu-liu iha estabelesimentu nian.

Christoph Suppiger, informa daudaun ne’e projetu fizika iha terrenu seidauk bele hahú tanba sei konsentra  hela ba  preparasaun ba konkursu (tenderizasaun) ba projetu reabilitasaun ba Estádiu Munisipál Díli.

FIFA rasik halo ona komunikasaun Sekretariu Estadu Terras no Propriedades, atu haré ba futuru kolaborasaun estabelesimentu estádiu padraun internasionál.

“Ita iha sikulu ida FIFA FORWORD, 4 .0 ne’ebe sei ko’alia tinan oin, ida ne’e mak ami  nia fundu infraestrutura ne’ebé sei konsentra fila-fali ba iha Estádiu padraun internasionál. Kuandu, hetan  ona resposta ida di’ak husi Governu, liu-liu asegura terenu ne’ebé atu sai konstrusaun ba Estádiu padraun internasionál,”  Christoph Suppiger hateten iha ámbitu halo outside visit  ba Estádiu Munisipál Díli.

Fatin hanesan Sekretáriu Jerál Federasaun Futébol Timor –Leste (FFTL), José Adilson Coreia  relata kona-bá  prosesu konstrusaun ba stádiu foun  Tasi -Tolu dadaun ne’e hetan ona konfirmasaun ho parte Governu liu-husi Sekretariu Estadu Terras no pPopriedades, konfirmadu ona kona-bá estatutu rai nian.

FFTL mós confirma katak  dadaun ne’e seidauk bele hahú halo konstrusaun tanba sei foku hela ba prosesu tenderizasaun ba reabilitasaun ba Estádiu Munisipál Díli.

“Ita agora avansa uluk Estádiu Munisipál Díli, hotu maka ita hakat ba iha Estádiu padraun internasionál. Maibé,  FFTL  mós la’ós tur nonok de’it, tanba antes ne’e ami halo esforsu maka’ás, ekipa sira husi diresaun infraestrutura FFTL nian hamutuk ho parte ténika nian sira ho parte  ho téknika DNTP  konintua halo levantamentu ba rai ka terrenu ne’ebé atu harii kampu ho padraun interasionál,”  José Adilson hateten.

Federasaun Futébol Timor –Leste mantein nafatin tuir pedidu ne’ebe fó Governu mós aseita no FIFA mós sei vizita fatin ne’ebá bele iha vantazen ba  halo konstrusaun estádiu boot ida.

Jornalista: David Gonçalves / Fidelino De Araújo