MJDAK Deside Atleta Karate La Partisipa Asian Games, La’ós Buat Foun Ba FEKATIL

Kompetisaun Nasionál Karate-do “Xanana Cup 2026” .

Díli, 19 Agostu 2026 (RAFA)   –  Federasaun Karate-do Timor-Leste (FEKATIL) konsidera deklarasaun Ministru  Juventude, Desportu, Arte no Kultura (MJDAK) Nélio Izaac Sarmento, ne’ebé deside modalidade Karate-do la partisipa iha eventu internasionál Asian Games  Nagoya-Japaun iha fulan-Setembru no fulan-Outubru, tinan-ne’e, la’ós buat foun ba FEKATIL.

Sekrétariu Jerál FEKATIL, António Carlos de Araújo, konsidera desizaun MJDAK nian ne’e  depende ba governu ninia apoiu no mós la haré ba prestasaun sira ne’ebé modalidade karate rasik hatudu iha tempu anteriór sira.

“Ba Asian Games ne’ebe  Karate la ba la’ós kestaun bo’ot ba ami, ne’e depende ba governu nia apoiu liu-liu ba parte osamentu,” Sekrétariu Jerál FEKATIL, António Carlos de Araújo, hateten Kuarta-ne’e.

Nia mós hakarak haloos kona -ba deklarasaun MJDAK nian ne’e katak karate seidauk hetan prestasaun ne’ebe  signifikativu iha inivél internasional, ida-ne’e atu relata deit iha parte diresaun desportu la dauk hato’o informasaun klaru  ba MJDA saida maka Federasaun Karate-do Timor -Leste, oferese ona medalla lubuk ida mai iha  Timor – Leste.

Sekrétariu Jerál FEKATIL haktuir hahú keda iha 2005  to’o agora alteta karate-do hetan ona medalla mai Timor-Leste to’o 2023 , jogus sira ne’ebe atleta karate-do partisipa durante ne’e  hahú kedas 2022 tesik mai ne’e  sira la hetan suporta husi Governu,  hodi partisipa eventu internasional sira buka jeitu oinsa bele partisipa.

Liga ho desizaun MJDAK nian ne’e,   FEKATIL lamenta tanba haluha tiha prestasaun sira ne’ebe modalidade refere hatudu iha eventu internasionál sira iha tinan hirak liu ba kotuk no la haré mós ba prestasaun sira ne’ebe modalidade ne’e hatudu hodi rekolla medalla dahuluk iha Timor –Leste dezde tempu independesia to’o agora.

“Ami agradese  ba iha tinan ida ne’e, pela primeira vez hetan apoiu osan husi Governu liu-husi MJDAK, ami bele ba partisipa eventu rua hanesan iha Asian Karate Senior Championships ne’ebe maka realiza iha Bali-Indonézia ne’ebe maka partisipa husi nasaun 45 no  no ida seluk maka Shout Asian Karate Championship junior iha Vietname,’’ Sekrétariu Jerál FEKATIL afirma.

Iha eventu internasionál Asian Game Japaun, tinan ne’e,  sei partisipa atleta hamatuk na’in-13  kompostu husi modalidade atletismu ho atleta na’in-tolu, Natasaun  na’in-rua,   Voley Praia  na’in-rua, Taekwondo  na’in-ida, Halterofilismu na’in-rua, Wresting  na’in-ida no  Archeri na’in-rua.

Enkuantu  husi total númeru atleta 13 ne’e atleta na’in-hitu konsentra iha ótel audian no atleta  na’in -neen  halo hela preparasaun iha rai-li’ur.

Jornalista: David Gonçalves /Domingos Bere