College of Asian Scholars Halakon S’Amuser FC 10 – 0 iha AFC Women’s Champions League 2026-2027

S’Amuser lakon ho College of Asian Scholars ho score 10-0 iha AFC Women’s Champions League 2026-2027 ne’ebé hala’o jogu iha estádiu Pathum Thani, Tailándia, Segunda 17 Agostu 2026. Imajen/Espesiál

Díli, 18  Agostu 2026 (RAFA) –  Reprezentante Timor-Leste husi ekipa  S’Amuser lakon ho College of Asian Scholars  ho score 10-0  iha AFC Women’s Champions League 2026-2027  ne’ebé hala’o jogu iha estádiu Pathum Thani, Tailándia, Segunda-ne’e.

Jogu ne’e hahú ho atrazu uitoan tanba udan-boot. Maibé, bainhira jogu ne’e komesa, ekipa College of Asian Scholars halo kedas  dominasaun no harii atake maka’as kontra liña defensiva S’Amuser FC.

College of Asian Scholars konsege loke score iha minutu lima liuhosi jogadora Khwanjira, ne’ebé halo remate maka’ás no la fó oportunidade ba guarda-redes S’Amuser FC atu defende. Ho golu ne’e, College of Asian Scholars lidera 1-0.

Dominasaun ekipa husi Tailándia kontinua. Iha minutu 23, College of Asian Scholars aumenta vantajen sai 2-0 liuhusi sira nia jogadora Long, ne’ebé marka golu ho asaun cabesada,  hafoin simu bola husi kantu.

Liu deit minutu tolu, iha minutu 26, College of Asian Scholars  kontinua halo presaun no konsege aumenta tan vantajen sai 3-0 liuhusi jogadora Kanyanat.

S’Amuser FC koko responde ho kombinasaun pasazen bola badak no buka espasu kontraatake. Maibé, liña defensiva College of Asian Scholars hatudu organizasaun di’ak no konsege taka espasu sira, nune’e S’Amuser FC difisil atu kria oportunidade  iha baliza oin.

College of Asian Scholars kontinua hatudu prestasaun ne’ebé forte no konsistente. Nune’e iha minutu 37, Kanyanat fila-fali marka golu ba daruak iha partida, hodi aumenta score sai 4-0.

Iha jogu primeira parte atu ramata, College of Asian Scholars konsege aumenta tan vantajen iha minutu 44, hodi taka primeira parte ho score 5-0.

Iha segunda parte, College of Asian Scholars nafatin domina partida no kontinua halo presaun ba S’Amuser FC. Ekipa husi Tailándia konsege aumenta tan golu lima;  Khwanjira marka iha minutu 47, antes Gettys aumenta score iha minutu 59,  Taneekarn marka golu iha minutu 69, tuir mai Uraiporn iha minutu 78, no Kurumi taka festa golu ikus iha minutu 88.

Ho rezultadu 10-0, S’Amuser FC agora okupa provizoriamente pozisaun terseiru iha Grupu D ho pontu 0 husi partida ida.

Iha Grupo D, S’Amuser FC hamutuk ho College of Asian Scholars, 4.25 SC no Kharaatsai FC.

Jornalista: Marito da Costa