Asosiasaun Futeból Díli Leste Hala’o Kompetisaun Jogu Sub-15 Hodi Buka Fini Foun

Abertura jogu sub-15 ne'ebé organiza husi Asosisaun Futeból Díli Leste, Kinta 13 Agostu 2026.

Díli, 14  Agostu 2026 (RAFA)— Asosiasaun Futeból Díli Leste hala’o kompetisaun jogu sub-15 ba feto no mane ne’ebé envolve estudante sira husi Munisípiu Díli hodi buka fini  foun  ne’ebé iha talentu  no prestasaun.

Atividade kompetisaun ne’e rasik hetan apoiu osamentu husi Federasaun Futeból Timor-Leste (FFTL) no tuir planu komisaun organizadora sei prepara prémiu ba manan na’in sira husi primeiru lugar, segundu  no terseiru.

Iha  abertura jogu ne’ebé  hala’o iha Kampu Futeból Lecidere, Díli,  Kinta-ne’e, Prezidente Asosiasaun  Futeból Díli Leste, Aleixo “Cobra” da Costa Gama hateten objetivu prinsipál ba iha atividade kompetisaun futeból Sub-15 ne’e atu oinsá fasilita asosiasaun hodi halo selesaun ba jogadór feto no mane sira ne’ebé iha prestasaun mai husi eskola ensinu sekundária sira iha Díli laran.

Kompetisaun futeból Sub -15 ne’e partisipa husi ekipa futeból  feto no mane hamutuk 10 no ba futuru sei buka meius hodi aumenta tan  númeru partisipasaun husi estudante sira husi eskola seluk.

Aleixo Cobra hateten haré ba kada tinan FFTL apoiu finanseiru Asosiasaun  Futeból Díli Leste prontu realiza kompetisaun ba jogadór feto no mane Sub-15  no Sub-16, atu nune’e, bele hetan fini jogadór  ne’ebe di’ak  hodi prepara sira reprezenta Timor-Leste ba iha rai-li’ur.

Ba oin, Asosiasaun  Futeból Díli Leste halo esforsu  nafatin atu bele envolve  estudante eskola hotu atu  partisipa kompetisaun jogu sub-15 ho sub-16  hodi bele halo selesaun ba jogadór ne’ebé iha abilidade di’ak no prestasaun.

Jornalista: David Gonçalves