F.C Coelho Konsidera Regra AFTL Permite Jogadór Estranjeiru Na’in-tolu Joga iha Kampu Fó Impaktu Ba Selesaun Nasionál

Jogadór F.C Coelho halo preparasaun fizika no abilidade atu enfrenta Liga Futsal Timor-Leste époka 2026.

Díli, 14 Agostu 2026 (RAFA)- Klubu Primeira Divizaun F.C Coelho konsidera regra foun ne’ebé Asosiasaun Futsal Timor-Leste (AFTL)  aplika hodi permite jogadór estranjeiru na’in-tolu joga iha kampu bele fó Impaktu ba dezenvovimentu jogadór nasionál (lokál) no mós ba Selesaun Nasionál.

“Husi pozisaun F.C Coelho nian kona-bá regra foun ida ne’e, ha’u hanoin F.C Coelho la aseita tebes tanba impaktu ne’e ba selesaun, tanba jogadór estranjeiru na’in-tolu tuir lolos labele, tanba estranjeiru labele domina fila fali lokal,”  treinadór F.C Coelho Frangenio Da Cruz ba RAFA iha Kampu Xanana  iha Delta III,  Díli, Kinta-ne’e.

Treinadór ne´e hatutan jogadór lokal tenke domina iha liga, atu hasa’e kualidade, hetan minutu jogu barak no akumula esperiénsia ne’ebé importante ba Selesaun Nasionál.

F.C Coelho mós konsidera katak dependénsia ba jogadór estranjeiru bele limita dezenvolvimentu talentu lokál, tanba klubu sei menus motivasaun atu forma no produs jogadór foun. Tanba ne’e, F.C Coelho defende atu jogadór lokal domina, hodi fó oportunidade ba joven sira no produs talentu foun ba futsal Timor-Leste.

“Husi Coelho apoiu tebes regra anteriór ne’ebé mak uza jogadór estranjeiru na’in- rua no se bele bolu estranjeiru maibé tenke iha estranjeiru ne’ebe mak joga profisionál atu nune’e sira mai fahe esperensia ba ita nia jogadór,”  nia hateten.

Klubu Caesar Dante F.C mós perkupa ho desizaun AFTL ne’ebé aumenta kuota jogadór estranjeiru ba na’in-tolu joga iha kampu.

Jornalista: Davilio Valdamir