Caesar Dante F.C Preokupa Desizaun AFTL Aumenta Kuota Jogadór Estranjeiru Ba Na´in-Tolu Joga iha Kampu

Prezidente Klubu Caesar Dante F.C, Natalino Ornai Guterres.

Díli, 12 Agostu 2026 (RAFA)- Klubu Primeira Divizaun, Caesar Dante F.C, preokupa ho desizaun Asosiasaun Futsal Timor-Leste (AFTL) ne’ebé aumenta  kuota jogadór estranjeiru husi na’in-rua ba na’in-tolu bele joga iha kampu ba époka ne’e.

Prezidente Klubu Caesar Dante F.C, Natalino Ornai Guterres, ba RAFA iha kampu futsal Kintal-Boot, Díli, Tersa-ne’e, hatete kona-bá regulamentu foun ne’ebé AFTL atu implemeta hodi  hasa’e kuota jogadór estranjeiru ba tolu iha kampu laran ne’e desde inisiu Caesar Dante lamentu oituan maibé kontinua submete ba desizaun órgaun AFTL nian.

“Sira husi AFTL mai ho argumentu dehan katak razaun ida atu hasa’e kapasiadade jogadór lokal sira nian, maibé ami haré katak regulamentu antes ne’e di’ak liu, mais prontu ida-ne’e desizaun husi AFTL,”  Prezidente Klubu Caesar Dante F.C, Natalino Ornai Guterres hateten.

Prezidente Klubu ne’e subliña, maske husi parte klubu konsidera katak regulamentu anteriór ho kuota jogadór estranjeiru na’in-rua iha kampu laran di’ak liu, maibé AFTL iha regra rasik atu dezenvolve modalidade Futsal iha Timor-Leste tanba ne’e Caesar Dante FC  respeita no tuir desizaun AFTL.

Antes ne’e Asosiasaun Futsal Timor-Leste (AFTL) pronunsia ona katak Liga Futsal Timor-Leste époka 2026 sei implementa mudansa iha regulamentu, liuliu kona-bá limite jogadór estranjeiru. Iha regulamentu anteriór, jogadór estranjeiru na’in-rua de’it mak bele tama kampu hamutuk, maibé iha époka 2026, hasa’e ba na’in-tolu.

 Jornalista: Davilio Valdamir