Atleta Xinés Bangliu Zhang no Jiali Wang Okupa Primeiru Lugar iha Full Marathon Ba Kategória Mane-Feto

Atleta internasionál hosi Nasaun Xina, Bangliu Zhang no Jiali Wang, okupa primeiru lugar iha Full Marathon ba kategória mane no feto iha kompetisaun Díli Internasionál Maratona (DIM) 2026.

Díli, 8 Agostu 2026 (RAFA) — Atleta internasionál hosi Nasaun Xina, Bangliu Zhang no Jiali Wang, okupa primeiru lugar iha Full Marathon ba kategória mane no feto iha kompetisaun Díli Internasionál Maratona (DIM) 2026 ho kilometru 42 ne’ebé hala’o iha Díli, Sábadu-ne’e.

Bangliu Zhang, atleta mane hosi Xina, hatudu nia apresiasaun ba oportunidade ne’ebé fó hosi Governu Timor-Leste liuhosi Díli Internasionál Maratona no atleta ne’e nia partisipasaun iha DIM la’ós de’it kona-bá kompetisaun desportiva, maibé mós fó oportunidade ba nia atu haré no koñese diretamente Timor-Leste nia natureza no ambiente.

“Ha’u agradese ba ha’u nia nasaun tanba fó oportunidade ida-ne’e mai ha’u atu kompete iha rai-li’ur. Depois, ha’u kontente tebes tanba manán ona,” Bangliu Zhang hateten.

Atleta ne’e mós relata katak  antes ne’e  nia partisipa ona iha maratona oioin, maibé DIM 2026 mak sai oportunidade dahuluk ba nia atu kompete iha eventu maratona iha Timor-Leste.

“Ida-ne’e mak ha’u nia dala uluk partisipa iha maratona ida-ne’e. Ha’u nia objetivu prinsipál mak atu hetan pozisaun ida ne’ebé di’ak no klasifikasaun ne’ebé di’ak liu,” nia esplika.

Jiali Wang, atleta feto hosi Xina, mós hatudu nia kontente tanba oportunidade atu partisipa iha DIM 2026.

Nia destaka beleza paizajen iha dalan korrida, ne’ebé fó esperiénsia diferente durante nia partisipasaun iha prova 42.195 km.

“Ha’u halai ho sira ba tempu balun iha inísiu, no sira impresionante tebes. Ha’u hanoin atleta sira husi Timor forte, maibé depois tempu balun, sira hahú la dun toman ha’u,” Jiali Wang dehan.

Jiali Wang mós apresia paizajen sira iha Timor-Leste no dehan katak nia sente divertidu tanba bele mai vizita no haré diretamente ambiente, natureza no paizajen oioin iha nasaun ne’e.

Bangliu Zhang no Jiali Wang to’o iha Díli iha loron 5 fulan-Agostu 2026 hodi partisipa iha Dili Internasionál Maratona, ne’ebé reúne atleta hosi Timor-Leste, Xina no nasaun sira seluk

Partisipasaun atleta Xina na’in rua ne’e aumenta dimensaun internasionál ba DIM 2026, tanba sira kompete hamutuk ho atleta élite hosi Timor-Leste, nasaun sira seluk iha rejiaun ASEAN no parseiru internasionál sira.

Liuhosi eventu desportivu ne’e, Díli Internasionál Maratona mós sai plataforma ida atu promove relasaun entre povu Timor-Leste no China, liuhosi desportu, interkambiu esperiénsia no hametin amizade entre atleta hosi nasaun rua.

DIM 2026 lori tema “Hadomi Ita Nia Ai-Laran no Balada Fuik Sira”, ho mensajen importante kona-ba preservasaun ambiente no natureza Timor-Leste.

Eventu DIM ne’e atu promove mos atleta lokal sira ba mundu internasionál liu-liu ba hirak ne’ebé maka iha mehi hakarak sai atleta maratona ne’ebé di’ak liu no fó prestastasaun ba nasaun.

Jornalista : Remigia Locatelli