Joanito Fernandes Terseru Lugar Ba Kategoria Full Marathon DIM 2026

Atleta Timoroan, Joanito Fernandes, konkista terseru lugar ba kategoria full maratona ho distánsia kilometru 42 iha eventu Dili internasionál Maratona (DIM) 2026.

Díli, 08 Agostu 2026 (RAFA)- Atleta Timoroan, Joanito Fernandes, konkista terseru lugar ba Kategoria full maratona ho distánsia kilometru 42 iha eventu Dili internasionál Maratona (DIM) 2026 ne’ebe kompete husi atleta nasionál no internasionál hamutuk 80 iha Dili, Sábadu-ne’e.

Atleta ne’e hatudu nia orgullu tanba konsege konkista kampeaun Dili Internasionál Maratona 2026, ba dala-rua iha kategoria 42 kilometru.

Iha kompetisaun tinan 2025, nia remata maratona ho tempu oras rua, minutu 37. Enkuantu iha edisaun 2026, nia konsege hadi’a nia prestasaun, ho tempu besik  oras 2 no minutu 32 to’o minutu  33. Maski diferensa tempu la boot, rezultadu ne’e sai indikasaun katak nia kontinua hadi’a nia prestasaun no kapasidade iha kompetisaun atletismu. Tanba ne’e, nia sente orgullu no agradese tebes ba rezultadu ne’ebé nia konsege atinji iha Dili International Marathon 2026.

“Ha’u  kontente no orgullu tebes bele sai kampeaun ba iha DIM 2026 no iha 2025 ha’u sai kampeaun ba kilometru 42 no iha tinan ne’e mós sai kampeaun,” Joanito Fernandes hateten.

Atleta ne’e hatutan katak hadi’a nia tempu iha kompetisaun tinan ida-ne’e la’ós buat ne’ebé fasil. Rezultadu ne’e mai husi nia kompromisu atu fila fali ba programa treinu loron-loron, ho treinu ne’ebé naruk no intensivu.

“Ba rekord ne’ebé ohin ha’u hatun minutu balu ne’e tanba fila ba programa treinu lor-loron ne’e mak hamenus ha’u nia tempu ne’e tanba Maratona ne’e persiza treinu barak, treinu dook no treinu han tempu,” nia hateten.

Atleta ne’e mós rekomenda nafatin ba Prezidente Repúblika José Ramos-Horta atu ba oin nafatin kontinua eventu Díli Internasionál Maratona, nune’e bele halibur  joven sira no kontribui hamenus konflitu iha Timor-Leste.

Nia mós enkoraja atleta Timoroan sira seluk neʼebé la hetan kampiaun atu labele lakon vontade tanba ne’e jogu, epera katak tinan oin mai perpara aan diak liu tan nune’e tinan oin mai bele sai kampeaun.

 Jornalista : Davilio Valdamir