MJDAK Husu Atleta sira Aproveita DIM Ba Dezenvolve Kapasidade iha Modalidade Atletismu

Membru Governu sira no pesoál korpu dipolmatiku sira hola parte iha eventu Díli Internasionál Maratona , Sábadu 8 Agostu 2026.

Díli, 8 Agostu 2026 (RAFA)- Ministru Juventude, Desportu, Arte no Kultura (MJDAC), Nelio Isaac Sarmeto, husu atleta Timoroan sira atu aproveita oportunidade iha Dili Internasionál Maratona (DIM) 2026 hodi dezenvolve kapasidade no prepara-an sai atleta nasionál ne’ebé kompetitivu iha futuru.

Ministru Juventude, Desportu, Arte no Kultura, Nelio Isaac Sarmento, ba jornalista sira iha eventu DIM 2026 iha Palásiu Prezidensiál, Sábadu-ne’e, hatete atividade ne’e la’ós de’it kompetisaun desportiva, maibé mós sai meiu ida atu promove Timor-Leste iha nivel internasionál liuhusi atleta sira.

“Díli Internasionál Maratona ne’e hanesan atividade ida atu promove Timor-Leste liuhusi atleta sira ba mundu internasionál. Atividade ne’e mós atu hasa’e konsiénsia komunidade nian kona-ba importánsia pratika ezersísiu iha moris loroloron,” Ministru Nelio Isaac Sarmento haktuir.

Governante ne’e hatutan katak maratona bele konsidera hanesan atividade desportiva ne’ebé ajuda komunidade atu mantein saúde no prevene moras oioin.

DIM mós fó oportunidade ba atleta lokal no internasionál atu fahe esperiénsia no aprende malu. Enkuantu, enkontru entre atleta no parte sira ne’ebé envolve iha desportu bele loke espasu ba diskusaun no kooperasaun, inklui iha nivel ASEAN.

Nia hateten katak liuhusi atividade DIM, Governu bele haré no avalia kualidade atleta ida-idak hodi bele prepara programa dezenvolvimentu desportu ba futuru.

Ministru Nelio Isaac Sarmento kontinua husu atleta lokal, liuliu sira ne’ebé iha interese no paixaun ba atletismu, atu komesa treinu ho disiplinu no aproveita oportunidade ne’ebé iha.

“Atletismu ne’e la’ós investimentu boot. Atletismu depende ba ita idaidak nia disiplina atu uza oportunidade ba treinu, halai iha estrada ka fatin seluk ne’ebé livre. Kuidadu ita-nia aan, para loron ruma, bainhira ita hakarak sai atleta maratona, ita bele sai,” nia tenik.

MJDAK mós husu ba labarik no joven sira ne’ebé iha interese iha desportu atu uza atividade hanesan DIM nu’udar oportunidade hodi dezenvolve prestasaun no kontribui ba nasaun.

Enkorajamentu ba atleta Timoroan sira ne’ebé iha paixaun ba modalidade maratona atu treinu ho objetivu klaru, aprende husi atleta internasionál no hatudu atitude di’ak hodi prepara-an ba futuru nu’udar atleta nasional.

“Kompetisaun ba disiplina, aprende husi atleta internasionál sira hodi prepara ita-nia aan atu sai atleta ida ne’ebé di’ak liu iha nasaun,” nia subliña.

Dili International Marathon 2026 ho tema “Mai Ita Halai Hodi Hadomi Ita-nia Rai-Laran no Animál Fuik Sira” (Love Our Forests and Wildlife).

Atividade ne’e envolve atleta nasional no internasionál hamutuk 5.000 resin partisipante, inklui atleta sira husi nasaun estranjeiru hamutuk 30 nasaun.

Dili International Marathon sai nu’udar eventu desportivu internasionál ida ne’ebé fó oportunidade ba Timor-Leste atu promove desportu, saúde no poténsial atleta lokal iha nivel internasionál.

Jornalista: Remigia Locatelli