FFTL Reafirma Konfiansa no Apoiu Ba Gianni Infantino iha Dezenvolvimentu Futeból Mundiál

Prezidente FFTL, Nilton Telmo Gusmão dos Santos ho Prezidente FIFA Gianni Infantino. Imajen/Espesiál FFTL

Díli, 08 Agostu 2026 (RAFA)- Federasaun Futeból Timor-Leste (FFTL) liu husi deklarasaun ofisiál ne’ebé RAFA asesu, deklara kontinua  fó konfiansa no apoiu Prezidente Federasaun Internasionál Futeból (FIFA), Gianni Infantino, ba dezenvolimentu futeból iha mundu iklui Timor-Leste.

Federasaun Futebol Timor-Leste (FFTL) fiar katak forsa loos husi futebol mak nia kapasidade atu inspira esperansa, kria oportunidade no hamutuk nasaun hotu-hotu iha vizaun komún ida ba dezenvolvimentu no solidariedade.

Dokumentu ofisiál ne’ebé RAFA asesu haktuir FFTL rekoñese no fó apoiu tomak ba vizaun Prezidente FIFA, Gianni Infantino, ne’ebé nia lideransa sai hanesan instrumentu importante hodi hametin futebol mundiál no kria oportunidade boot liután ba nasaun hotu.

Ba nasaun ida hanesan Timor-Leste, programa dezenvolvimentu FIFA, liuliu FIFA Forward, iha papel transformativu iha hadi’a infraestrutura futebol, hametin kapasidade institusionál FFTL, no avansa dezenvolvimentu tékniku futebol iha ita-nia rai.” RAFA sita dokumentu refere.

Investimentu sira ne’e fó kontribuisaun boot ba kresimentu sustentável futebol iha Timor-Leste no hatudu kompromisu forte Prezidente Gianni Infantino atu garante katak kada Federasaun Membru FIFA hetan oportunidade loos atu dezenvolve.

Timor-Leste seidauk sai poténsia boot iha mundu futebol, maibé Timor-Leste nunka lakon fiar iha poder husi esperansa. Ho lideransa Prezidente Gianni Infantino, FFTL fiar katak nasaun ki’ik sira mós bele soña, dezenvolve no harii futuru di’ak liután. Vizaun kona-bá inkluzaun, solidariedade no igualdade oportunidade ne’e mak inspira FFTL no hametin ita-nia konfiansa ba lideransa FIFA.

Konfiansa FFTL bazeia ba esperiénsia prátika iha kooperasaun ho FIFA no progresu konkretu ne’ebé hetan durante tinan sira liu ba. Rezultadu sira ne’e hametin ita-nia konviksaun katak lideransa Prezidente Gianni Infantino fó kontribuisaun desizivu hodi harii jogu futebol globál ida ne’ebé forte liután, unidu liután no inkluzivu liután, ho oportunidade ba ema hotu.

Iha espíritu ida ne’e, Federasaun Futebol Timor-Leste reafirma nia konfiansa ba lideransa Prezidente Gianni Infantino no sei kontinua servisu hamutuk ho FIFA no família futebol tomak hodi promove dezenvolvimentu sustentável husi futebol, atu fó benefísiu ba federasaun membru FIFA hotu.

Jornalista: Davilio Valdamir