PR ho Vise-PM Ofisialmente Lansa Díli Internasionál Maratona 2026

Díli Internasionál Maratona 2026.

Díli, 08 Agostu 2026 (RAFA) – Prezidente Repúblika (PR),  José Ramos-Horta ho Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay hamutuk ho membru Governu sira, Sábadu dader-ne’e, ofisialmente lansa Kurida Díli Internasionál Maratona (DIM) 2026 ne’ebé kompete husi atleta internasionál no nasionál  hamutuk na’in-5000.

Objetivu husi Díli Internasionál Maratona la’ós de’it atu hala’o kompetisaun desportiva, maibé mós atu promove identidade nasionál, beleza natureza no poténsia turizmu Timor-Leste ba komunidade internasionál.

Díli Internasionál  Maratona 2026 simu partisipante liu ema 5000 husi nasaun hamutuk 30 resin. Maratona ne’e hetan sertifikasaun husi World Athletics no akreditasaun husi Association of International Marathons and Distance Races (AIMS), ne’ebé asegura padraun internasionál ba kompetisaun.

Aleinde promove desportu no saúde, eventu ne’e mós integra kampaña konservasaun ambientál ho mensajen atu hadomi no proteje floresta no moris-fuik Timor-Leste.

Korida hahú iha tuku 05:30 dadeer ho kategoria Full Marathon (42 km), Half Marathon (21 km), Para Athletics (10 km) no Fun Run (5 km).

Partisipante sira mai husi nasaun barak, inklui Austrália, Portugal, Indonézia, Japaun, Korea Súl, Estadus Unidus, Malázia, Filipinas, Xina, Nova Zelándia, Tailándia no nasaun seluk tan.

Tuir observasaun RAFA  hatudu katak populasaun rihun-resin husi rai-laran no rai-liur, husi labarik to’o ema boot, nakonu iha estrada sira besik Palásiu Prezidensiál atu fó apoiu no akompaña Dili International Marathon 2026. Atmosfera eventu ne’e haré ho entusiazmu aas husi komunidade.

Atividade ne’e hetan seguransa másima husi Polísia Nasionál Timor-Leste (PNTL), ne’ebé koloka membru sira iha pontu estratéjiku hodi garante siguransa partisipante no públiku durante eventu.

Jornalista: Remigia Locatelli