Agostu, AFTL Realiza Liga Futsál Époka 2026-2027

Sekretáriu Jerál Asosiasaun Futsál Timor-Leste (AFTL), Mario Guterres.

Díli, 30 Jullu 2026 (RAFA.TL)–Sekretáriu Jerál Asosiasaun Futsál Timor-Leste (AFTL), Mario Guterres,  informa AFTL sei realiza Liga Futsál époka 2026-2027 iha fulan-Agostu, tinan ne’e.

“Sábadu agora, ami realiza technical meeting ho klubu sira para bele prepara ba loron 15  fulan-Agostu. Klubu 14 sei kompete iha priemeiru divizaun no ekipa 10  kompete iha segunda divizaun,”  Sekretáriu Jerál AFTL, Mario Guterres  ba RAFA.TL iha Xanana Sport Center, Díli, Kinta-ne’e.

Sekretáriu Jerál AFTL ne’e hateten katak, tuir planu inisiá Liga Futsál 2026 atu hahú iha loron 25 fulan-Jullu. Maibé, AFTL deside adia kompetisaun  atu fó tempu ba klubu sira kontinua prepara sira nia jogadór no treinadór.

Nia esplika katak desizaun ne’e mós liga ho implementasaun regulamentu foun hafoin remata Kopa AFTL, ne’ebé determina atu jogadór kampu-boot labele ona  partisipa joga iha kompetisaun futsál.

Nia esplika katak regulamentu kona-bá jogadór estranjeiru ba tinan ida-ne’e hetan mudansa kompara ho tinan kotuk. Tanba antes ne’e, kada klubu permite de’it uza jogadór estránjeiru na’in-rua mak joga. Maibé, agora AFTL permite klubu sira rejista jogadór estranjeiru to’o na’in-neen, no jogadór estránjeiru na’in-tolu mak bele kompete iha kampu laran.

Razaun AFTL permite jogadór estránjeiru mai joga iha Liga Futsál, Mario Guterres   fundamenta katak  AFTL hakarak kria espozisaun liga ne’e ba iha rejionál liuliu Ázia nian para bele atrai atensaun husi nasaun viziñu sira, hanesan Indonézia, Tailándia, Vietname kona-ba ezistensia Liga nian.

Nia hateten katak Liga Futsál 2026 sei kontinua uza Kampu Futsal Kuartel Jerál F-FDTL, tanba F-FDTL autoriza ona utilizasaun fatin refere.  Nune’e, ekipa AFTL halo hela manutensaun ba kampu atu asegura kondisaun di’ak no prontu simu kompetisaun iha tempu badak.

Jornalista: Davilio Valdamir