Dili International Marathon 2026 Prontu Simu Atleta Entre 2.000 To’o 3.000

Imajen/Reprodusaun

Díli, 29 Jullu 2026 (RAFA.TL)–International Marathon (DIM) 2026 prontu atu simu atleta entre 2.000 to’o 3.000 hosi Timor-Leste no nasaun oioin iha edisaun ba dala-10.

Eventu internasionál ne’e  sei realiza iha loron 08 fulan-Agostu 2026 iha  Díli ho intensaun hakarak promove desportu, moris saudável no turizmu, nune’e mós promove Timor-Leste ba komunidade desportiva internasionál.

“Ita mós konvida pais viziñu Austrália, Xina, Malázia no Indonézia. Ita-nia atleta nasionál ne’ebé agora iha faze preparasaun konsentra hela iha Gleno-Ermera. Dadaun ne’e husi li’ur 200-liu no husi rai-laran 300-liu mak ita rejistu ona, espera bele atinji to’o 2.000 no 3.000,” Prezidente Komisaun téknika  DIM, Afranio Xavier ba RAFA.TL iha Jináziu Desportu Díli, Kuarta-ne’e.

Nia hatete, Prezidente Asian Athletics sei vizita Timor-Leste antes Dili International Marathon no  tuir planu, nia sei to’o iha loron 6 fulan-Agostu no iha loron tuir mai sei hala’o programa balu, inklui audiénsia ho Governu atu ko’alia kona-bá dezenvolvimentu atletismu iha Timor-Leste.

Iha loron 08 fulan-Agostu, Prezidente Asian Athletics sei marka prezensa iha serimónia abertura Dili International Marathon no kalan sei partisipa mós iha serimónia entrega medalla ba atleta sira.

Kategoria full marathon sei partisipa hosi atleta hamutuk 200, no half marathon (meia marathon) sei tuir hosi atleta 400.

Kategoria rua-ne’e espesial ba atleta federadu no atleta kompetitivu sira, tanba presiza preparasaun fízika, treinu regulár no programa sistemátiku atu bele kompleta distánsia ne’e.

Ba komunidade jerál ka ema sira ne’ebé hakarak partisipa atu anima de’it, komisaun organizadora prepara ona kategoria  kilómetru lima, ne’ebé loke ba família no públiku atu partisipa iha atmosfera Dili International Marathon.

Federasaun garante katak preparasaun hotu la’o ho di’ak, tanba rota maratona ne’e hetan ona sertifikasaun husi federasaun internasional.

Nia hatutan, Prezidente Republika mós kontinua halo monitorizasaun ba preparasaun sira. Aleinde ne’e, Prezidente Komisaun Organizadora, Francisco Kalbuadi Lay nu’udár  Vise-Primeiru Ministru, Ministru Koordenadór ba Asuntu Ekonómiku, no Ministru Turizmu sei halo reuniaun regulár ho komisaun hotu atu rona no buka solusaun ba difikuldade ka dezafiu sira ne’ebé komisaun ida-idak enfrenta durante prosesu preparasaun.

Jornalista: Davilio Valdamir