Boxista Alcino Agradese Ba Oportunidade no Vitória Iha HSS

Ema rihun halo komboiu hodi selebra vitória boxista Timoroan ne'ebé foin fila husi eventu Holywings Sport Show (HSS) iha Bali, Indonézia, Kuarta 29 Jullu 2026.

Díli, 29  Jullu 2026 (RAFA.TL)- Boxista Timoroan, Alcino de Almeida, orgullu  tanba konsege konkosta vitória iha nia partisipasaun dahuluk iha eventu Holywings Sport Show (HSS) iha Bali, Indonézia.

Nia konsidera rezultadu ne’e hanesan esperiénsia importante ida iha nia karreira boxing internasionál.

“Foin badahuluk  joga iha HSS, ha’u sente kontente no orgullu tebes tanba ha’u konkosta  vitória ne’e. Ha’u mós  kontente tanba ekipa husi HSS no HSN responabiliza hotu  ba  ami,” Alcino de Almeida haktuir ba jornalista sira iha knua Revolta, Villa-Verde, Dili Kuarta-ne’e.

Iha fatin hanesan boxista Zonesi da Silva (Ozzy) husu ba Guvernu atu tau atensaun ba desportu boxing, tanba tuir nia, modalidade ne’e kontinua lori rezultadu no prestíjiu ba Timor-Leste iha kompetisaun internasionál.

Nia hatete katak, maski atleta boxing sira esforsu atu reprezenta nasaun, sira seidauk hetan apoiu hanesan atleta iha rai seluk, liuliu iha kestaun alimentasaun, vitamina no preparasaun fízika.

“Ha’u husu ba Prezidente Repúblika no Primeiru-Ministru ba oin  favór tau matan ba boxing tanba modalidade desportu hotu diak, maibe boxing, ami oferese buat barak ba Timor, maibe ami lahetan saida mak tuir atleta Indonézia hetan,”  nia hateten.

Delegasaun boxista Timor-Leste, kompostu husi Alcino de Almeida, Elísio Gaio, Daniel Martins no Zonesi da Silva (Ozzy) hamutuk ho nia treinadór,  ohin, to’o iha Aeroportu Internasionál Prezidente Nicolau Lobato, Díli, iha tuku 12;05 ho aviaun Citilink.

Bainhira sai husi aeroportu, delegasaun ne’e simu resepsaun husi família no komunidade sira, ne’ebé halo komboiu iha Kapitál Díli  kuaze oras tolu, antes remata iha rezidénsia Revolta.

Jornalista: Marito da Costa