Governu Presiza Kria Kondisaun Dignu Ba Boxista Timoroan

Komunidade simu Atleta boxe Timor-Leste, Delio ho Daniel iha Aeroportu Internasionál Prezidente Nicolau Lobato, Tersa 28 Jullu 2026.

Díli, 28 Jullu 2026 (RAFA.TL) – Reprezentante família husi boxista Delio Anzaquesi Mouzinho, husu ba Governu atu kria kondisaun ne’ebé dignu ba atleta boxe Timoroan, liu-liu sira ne’ebé hela iha nivel amador, hodi bele dezenvolve sira-nia talenta no kapasidade iha futuru.

Ana dos Santos Belo, nu’udár reprezentante família boxista Delio Anzaquesi Mouzinho, Tersa-ne’e, konfirma katak susesu ne’ebé baxista Delio ho Daniel hetan iha eventu Holywings Sport Night (HSN) iha Bali, Indonézia, sai ona inspirasaun no motivasaun ba atleta foun sira atu kontinua treina no konkosta prestasaun.

“Hau rekomenda ba Governu atu fó atensaun no fasilita ba alin sira ne’ebé iha boxe amador. Agora boxista Timoroan barak ona, no sira haré Delio ho Daniel nia susesu hanesan mata-dalan atu kontinua dezenvolve an atu kontirbui ba Timor-Leste iha futuru,” Ana dos Santos Belo haktuir ba jornalista sira iha Aeroportu Internasionál Prezidente Nicolau Lobato, Díli.

Nia hatutan vitória ne’ebé Delio ho Daniel hetan la’ós de’it ba familia, maibé ba povu no nasaun Timor-Leste tanba bainhira sira sae ba ring, sira lori bandeira RDTL no hoi no nasionál “Patria Patria” iha kompetisaun internasionál sira.

“Delio ho Daniel nia susesu mak susesu ba ita hotu. Prestasaun ida-ne’e la mai fasil, maibé liuhusi preparasaun ne’ebé di’ak, disiplina, esforsu boot no orasaun. Ami agradese ba padre, madre, maluk no povu Timor-oan hotu ne’ebé fó apoiu durante tempu preparasaun to’o iha loron kompetisaun,” Ana dos Santos Belo hateten.

Iha eventu Holywings Sport Night (HSN) ne’ebé realiza iha Atlets Super Club, Bali, Indonézia, Domingu foin lalais ne’e, boxista Delio Anzaquesi Mouzinho konsege halakon boxista Indonézia, Saroha Lubantobing, no Delio susesu sai kampiaun ba sintu OPBF Silver.

Iha luta seluk, Daniel de Asis Almeida mós  halakon nia adversáriu, Prestio, ho KO, no Daniel hetan sintu HSS Pro Super Bantamweight Championship.

Simu ho Orgullu iha Aeroportu

Atleta boxe Timor-Leste, Delio ho Daniel, ne’ebé reprezenta Timor-Leste iha kompetisaun Boxing Holywings Sport Night iha Bali, Indonézia, Tersa-ne’e, to’o hikas iha Timor-Leste no simu ho resepsaun entusiasmu husi adepta, família no komunidade sira iha Aeroportu Internasionál Prezidente Nicolau Lobato.

Bainhira sai husi portaun aeroportu, família simu kedas boxista nain rua ne’e ho tara tais no tau kaibauk, nu’udar símbolu respeitu no orgullu.

Iha tempu hanesan, komunidade barak mós hein ona ho bandeira nasionál, uniforma no fotografia husi atleta nai-rua, hodi hatudu apresiasaun ba esforsu no dedikasaun ne’ebé Delio no Daniel atinje  lori Timor-Leste nia naran ba arena boxe internasionál.

Hafoin seremónia simu iha aeroportu, atleta sira hamutuk ho komunidade realiza komboiu vitória ne’ebé hahú husi Aeroportu liu husi estrada prinsipál sira iha kapital Díli.

Komboiu ne’e kontinua ho vizita relijiozu iha fatin importante balu iha Díli. Delegasaun tun hosi diresaun Mandarin, liu husi Praia dos Coqueiros, no ba Igreja Motael hodi halo orasaun.

Hafoin ne’e, para minutu balu iha Estátua Sebastião Gomes hodi fó omenajen, antes kontinua ba Simitériu Santa Cruz hodi reza no fó respeitu ba saudozu sira ne’ebé deskansa iha fatin ne’ebá, antes remata programa no fahe malu.

Durante komboiu ne’e, atmosfera nakonu ho alegria no espíritu nasionalizmu. Adepta sira hase’e bandeira Timor-Leste no fó aplauza ba atleta nai-rua, nu’udar forma ida hodi fó apresiasaun ba prestasaun, esforsu no dedikasaun ne’ebé sira hatudu iha arena boxe internasionál.

Resepsaun ida-ne’e reflete apoiu no valorizasaun husi povu Timor-Leste ba atleta sira ne’ebé reprezenta nasaun iha kompetisaun internasionál.

Jornalista: Marito da Costa