Federasaun Powerlifting Timor-Leste Delega Atleta Na’in-Rua Ba Asean Games Aichi-Nagoya 2026

Prezidente Federasaun Powerlifting Timor-Leste, Vicente de Carvalho.

Díli, 28 Jullu 2026 (RAFA.TL), Federasaun Powerlifting Timor-Leste sei delega atleta na’in-rua kompostu husi feto ida no mane ida atu reprezenta Timor-Leste iha Asean Games 2026 iha Aichi-Nagoya, Japaun.

Prezidente Federasaun Powerlifting Timor-Leste,  Vicente de Carvalho, ba RAFA.TL iha Díli, Tersa-ne’e, informa  atleta na’in-rua ne’e mak Nivio no Ester, ne’ebé daudaun ne’e prepara an ona atu partisipa iha kompetisaun hit besi ne’e.

Nivio sei tama iha kategoria peso 70 kg, enkuantu Ester sei kompete iha kategoria peso 50 kg.

“Agora dadaun ita prepara atleta na’in-rua; feto ida no mane ida, iha mós atleta seluk, maibé agora daudaun ita hetan oportunidade ba na’in-rua ne’e,”  Vicente de Carvalho hateten.

Daudaun ne’e atleta Ester  halo preparasaun iha rai-laran no Nivio hetan bolsu estudu husi Olímpico Solidarity ne’ebé sei halo treinamentu iha Tailándia, la’ós ba deit Asean Games maibé to’o Olímpico Games.

Nia hatutan, atleta Ester ne’ebé atu kompete iha klase peso 50 sei konsentra ho atleta nasional sira husi modalidade seluk iha loron 03 fulan-Agostu molok partisipa iha Asean Games  Aichi-Ngoya 2026.

Prezidente Federasaun Powerlifting Timor-Leste mós rekonese katak Asean Games ne’e impossível, maibé Nivio bele perpara ho tempu naruk.

Asean Games Aichi-Nagoya 2026  ba dala-XX  sei partisipa husi nasaun 45, inklui Timor-Leste. Kompetisaun ne’e abertura ofisiàl iha loron 19 fulan-Setembru to’o loron 04 fulan-Outubru 2026, no sei partisipa husi atleta liu 10.000 ne’ebé sei kompete iha modalidade desportu  hamutuk 43.

Jornalista: Davilio Valdamir