AD SLB Laulara Kampeaun Liga Timorense Époka 2026

AD SLB Laulara susesu sai kampeaun ba Liga Timorense Primera Divizaun époka 2026.

Díli, 23 Jullu 2026 (RAFA.TL)- Ekipa AD SLB Laulara susesu sai kampeaun ba Liga Timorense Primera Divizaun époka 2026 hafoin halakon adversáriu Aitana F.C ho score 3-0.

Iha jogu  jornada ikus ne´ebé hala’o iha Estádiu Munisipál Díli, Kuarta-ne´e, ekipa AD SLB Laulara hahú jogu ne´e ho ambisaun no fiar an, tanba presiza deit pontu ida atu xave titúlu kampiaun.

Ho euforia no entusiazmu ne´ebé jogadór sira iha, halo ekipa Makikit Laulara iha liután animu atu rekolla vitória hodi marka istória foun.

Ekipa AD SLB Laulara hatudu kedas jogu ofensivu ho presaun aas husi inisiu jogu. Aitana F.C konsege mantein nia organizasaun iha liña defeza ho di’ak no konsege aproveita hodi responde ho kontra atake ne´ebé lais. Maibé,  tama iha minutu 30 ekipa AD SLB Laulara konsege produs golu ida liu husi jogadór Mouzinho Barreto de Lima hodi muda score ba 1-0.

Maske Aitana F.C konsege mantein nia defeza sólida, maibé jogu ofensivu husi ekipa SLB ne´ebé kontinua fó presaun ba iha grande área ikus mai defeza Aitana F.C komete erru ida iha grande área no árbitru ne’ebé besik ba insidente ne’e deside fó kedas penalti ba AD SLB.

Makina golu husi Makikit Laulara, Italo Soares Pimentel ne´ebé mak sai ezekutador ba penalidade refere susesu hala’o nia servisu ho kalma hodi aumenta score ba 2-0 no score ne´e mantein to’o intervallu.

Tama ba segunda parte, AD SLB Laulara la muda nia ritmu jogu. Ekipa ne’e kontinua hatudu intensidade aas no kontrola jogu ho dominasaun bola no organizasaun ne’ebé di’ak.

Maski lidera ona ho escore 2-0, AD SLB Laulara kontinua lansa atake hodi buka aumenta vantajen, enkuantu Aitana F.C tenta buka dalan atu responde hodi hamihis score. Ritmu aas husi AD SLB Laulara halo Aitana F.C kontinua hetan presaun durante segunda parte no tama ba iha minutu 64 Mouzinho Barreto de Lima marka tan golu ida hodi haboot liu tan score ba 3-0.

Ho score refere jogu kontinua manas liután ba ekipa rua ne’e hodi lansa kontra atake ba malu maibé la iha tan golu ruma maka akontese to’o termina jogu segunda parte vitóri ba AD SLB Laulara.

Husi rezulatadu vitória ne´ebé mak ekipa istimadu Makikit Laulara ne’e hetan lori sira sai kampeaun ba Liga Timorense Primera Divizaun ho pontu 25 husi jogu sia ne´ebé sira hala’o, manán ualu no empata ida no la sente moruk hosi derrota.

Ho susesu sai kampeaun Liga Timorense Primeira Divizaun époka 2026, AD SLB Laulara simu troféu kampeaun no prémiu osan ho montante US$ 25.000.00.

Jornalista: Davilio Valdemir/Editór: Vito Salvadór