DIT F.C Sai Husi Zona Degradasaun no Hanehan As Marca Ba Segunda Divizaun Époka 2027

DIT F.C vs As Marka

Díli,  18 Jullu 2026 (RAFA.TL)- Ekipa DIT F.C susesu sai husi zona degradasaun no hanehan nia adversáriu AS Marca fila hikas ba segunda divizaun époka 2027.

Ekipa DIT F.C susesu rekolla pontu tolu ho vitória fantastiku 4-1 hasoru adversáriu AS Marca iha jogu kontinuasaun primeira Divizaun Liga Timorense époka 2026 ne’ebé halao iha Estádiu Munisipál Díli, Sábadu-ne’e.

Ekipa rua hatudu jogu ne’ebé kompetitivu no halo atake ba malu desde jogu priemeira parte hahú.

Tama ba minutu 10, DIT F.C hetan oportunidade dahuluk liuhosi jogadór estranjeiru Kouda Affo, hodi husik sutu maka’ás ida iha área penalidade hafoin simu bola kruzamentu husi Eufrazio Lopes, maibé, guarda-rede As Marka konsege antisipa no salva bola.

As Marka mós kria oportunidade iha minutu 20 liuhusi Leonizo da Cruz no Jogadór ne’e lori bola husi liña sorin karuk tama ba área penalidade DIT F.C no husik sutu maka’ás ida, maibé guarda-rede DIT F.C konsege baku sai bola.

DIT F.C ikus mai marka golu iha minutu 29. Jogadór Zitu Moreira husik sutu maka’ás ida besik área penalidade ne’ebé la konsege salva husi guarda-rede As Marca, hodi fó avantajen 1–0 ba DIT F.C.

Liu deit minutu rua, As Marca liu husi jogadór Ezaquel da Cruz responde kedas hodi muda score ba empata 1-1.

Ekipa rua kontinua halo tentativa maka’ás ba malu, maibé tama ba minutu 38 DIT F.C marka tan golu ida liu husi José dos Santos hodi muda score ba 2-1 hodi mantein to’o intervallu.

Tama ba segunda parte, As Marca halo substituisaun ba sira nia jogadór ho intensaun hasa’e intensidade jogu, no komesa halo kontra-atake aas.

Iha minutu 55, Leonizo da Cruz hetan oportunidade di’ak ida, maibé nia sutu maka’ás husi área penalidade la konsege rezulta golu, tanba bola halai ses husi besi-riin.

Iha minutu 67, DIT F.C aumenta tan golu ida hodi muda score ba 3–1 liu husi jogadór Kouda Affo ne’ebé aproveita fallansu husi liña defeza adversáriu nian.

Liu deit minutu tolu, DIT F.C kontinua marka tan golu ida no muda score ba 4-1 liu husi jogadór Ayobami, hafoin simu pasajen di’ak ida husi Kouda Affo iha área grade area Adversariu.

Ho rezultadu ne’e, DIT F.C rekolla pontu sia no haksoit sai husi zona degradasaun,  enkuantu AS Marca ho derrota ne’e otomatikamente degrada ba Segunda Divizaun iha époka 2027.

Jornalista: Marito da Costa/Editór: Vito Salvadór