Úniku Golu Patricio da Silva Lori F.C Porto Seguru Husi Zona Degradasaun

Porto Taibesse F.C vs Emmanuel F.C.

Díli, 16 Jullu 2026 (RAFA.TL)- Úniku golu husi jogadór Patricio da Silva lori F.C Porto Taibesse seguru husi zona degradasaun, hafoin halakon nia adversariu Emmanuel F.C ho score 1-0, iha jogu kontinuasaun Liga Timorense Primera divizaun jornada da-ualu ne’ebé hala’o iha Estádiu Munisipál Díli-Kinta ne´e.

Desde inisiu jogu, ekipa rua  hatudu vontade boot atu domina jogu tuir ritmu idaidak nian, maske ekipa Emmanuel F.C tenta halo presáun no kria oportunidade oioin, maibé Azuis Branku mantein linha defensiva ne’ebé forte.

Ekipa rua kontinua lansa kontra atake ba malu hodi halo tensi jogu sa’e litán. Ho intensidade jogu ne´ebé aas ekipa rua lansa kontra atake ba malu no obriga liña defeza no guarda rede husi ekipa rua tenke halo servisu estra hodi asegura sira nia baliza husi bola ameasa sira no to’o intervallu ekipa rua mantein ho score 0-0.

Kontinua ba jogu segunda parte, Emmanuel F.C halo substituisaun ba jogadór hodi halo mudansa ba tátika no konsege domina liu bola hodi lansa atake sira no halo sutu direita sira ba ba rede F.C Porto Taibesse, maibé tentativa oioin ne’ebé lansa hosi ekipa Emmanuel F.C ne’e seidauk bele rezulta golu.

Tama ba iha minutu 65, F.C Porto Taibesse komesa halo substituisaun ba jogadór hodi substitui Mohammad Gaoshirowi sai no hatama Patricio da Silva no halo mudansa ba táika.

Mudansa ne’e konsege fo rezulatadu pozitivu hafoin tama ba iha minutu 70, Jogadór ne’ebé tama hanesan substitutu ne’e konsege marka golu hodi lori nia ekipa lidera ho score 1-0.

Ho score refere jogu sai manas liután ba ekipa rua ne’e hodi lansa kontra atake ba malu ho intensidade aas, maibé to’o termina jogu segunda parte score mantein 1-0 vitória ba F.C Porto Taibesse.

Husi rezulatadu vitória ne’e hatuur ekipa F.C Porto Taibesse iha pozisaun da-neen tabela klasifikasaun provizoriu ho pontus sia husi jogu ualu, manan rua no empata tolu no derota tolu. Enkuantu ekipa Emmanuel F.C mantein iha pozisaun da-haat ho pontus 10 husi jogu ualu manan tolu empata ida no derota haat.

Jornalista: Davilio Valdemir/Editór: Vito Salvadór