Liga Timorense, Coração F.C Manán Mihis DIT F.C 3-2

Ekipa Coração F.C. Imajen/LFTL

Díli, 14 Jullu 2026 (RAFA.TL)- Coração F.C susesu rekolla pontu tolu iha jogu kontinuasaun Liga Timorense Primera divizaun époka ne’e hafoin manán mihis ekipa adversáriu DIT F.C ho score 3-2.

Jogu ne’ebe hala’o iha Estádiu Munisipál Díli, ohin,  desde inísiu jogu ekipa rua tun kedas ho ambisaun boot hodi buka oportundade atu marka golu hodi asegura pontu másimu atu bele hases aan hosi zona degradasaun.

Ekipa DIT F.C ne’ebé mak domina liu bola iha priemeira parte konsege  muda uluk score iha minutu 33, liu husi jogadór Kouda Affo Mah, hafoin simu pasajen badak husi nia kompatriota José Santos iha liña klaran hodi muda kedas score ba 1-0.

Iha minutu 44, Coração F.C konsege responde kedas hodi halo balansu ba score sai 1-1 liu husi jogadór Yohanes Jemahan.

Score ne’e la dura to’o tempu primeira parte termina tanba tama ba iha minutu 45+1 Kapitaun ekipa DIT F.C José Santos konsege produs golu ida hodi lori nia ekipa lidera ho score 2-1 to’o termina jogu priemeira parte.

Kontinua ba jogu segunda parte tensi jogu komesa manas liután ba ekipa rua hodi lansa kontra atake ba malu.

Iha minutu 49, DIT F.C komete erru iha hasoru jogadór Coração F.C iha grande área no árbitu deside penalti ba ekipa Coração F.C.

Jogadór Jeka Monteiro ne’ebé ezekuta penalidade ne’e susesu marka golu ba DIT F.C hodi halo empata ho score  2-2.

Ho score refere jogu sai manas liután ba ekipa rua ne’e hodi lansa kontra atake ba malu hodi buka golu vitoria.  Iha minutu 90+2 ekipa Coração F.C konsege marka golu ida liu husi jogadór Pascoal Fernandes liu husi bola kabesada, hafoin simu asistensia bola kruza hodi muda score ba 3-2.

Ho rezulatadu ne’e hatuur ekipa Coração F.C iha pozisaun da-lima ho pontu sia husi jogu dala hitu, manán tolu no dereota haat. Enkuantu ekipa DIT FF.C tun ba pozisaun da-hitu ho pontu neen husi jogu hitu manán rua no derrota lima.

Jornalista: Davilio Valdamir/Editór: Vito Salvadór