Jude Bellingham Marka Brace no Lori Inglaterra Hakat Ba Meia-Finál Hafoin Manán Noruega 2-1

Jogadór estrella Inglaterra, Jude Bellingham marka golu rua (brace) no lori ekipa Three Lions avansa ba jogu meia-finál Kopa Mundiál 2026. Imajen/golo.fm

Díli, 12 Jullu 2026 (RAFA.TL)- Jogadór estrella Selesaun Nasionál Inglaterra (Three Lions), Jude Bellingham marka golu rua (brace) no lori ekipa Three Lions avansa ba jogu  meia-finál Kopa Mundiál 2026 hafoin halakon adversáriu Noruega ho score 2-1.

Jogu ne’ebé hala’o iha  Estádiu Miami- Estadus Unidus, domingu ne’e, Noruega lidera uluk jogu ne’e ho golu husi Andreas Schjelderup, maibé Inglaterra responde golu rua hodi rekolla vitória hafoin jogadór estrela Jude Bellingham marka golu rua iha primeira parte no tempu adisionál nian.

Bainhira árbitru huu apitu sinál jogu hahú, Noruega halo jogu inísiu ho perfeitu ba jogu hodi halo kedas atake no lansa kedas ameasa oin-oin ba ekipa Inglaterra.

Noruega kontinua ha;o jogu ida ho pasajen badak no lansa tan ameasa ida, maibé baliza Inglaterra Jordan Pickford sei bele salva bola ameasa ne’ebé iha no kontinua halo jogu badak husi liña kotuk hodi buka oportunidade atu kontrolu jogu.

Noruega aproveita oportunidade ne’ebé iha hodi lansa kedas golu ida ba adversáriu Inglaterra iha minutu 36 liu husi jogadór Schjelderup no muda score ba 1-0.

Inglaterra haka’as-an maka’as atu ultrapasa dezafiu sira no ikus mai halo empata iha tempu estra primeira parte liu husi jogadór Jude Bellingham hodi muda score ba 1-1 no score ne’e mantein iha tabela to’o ba intervallu.

Tama ba segunda parte, ekipa rua hasa’e intensidade jogu no lansa kontra atake ba malu, maibé la iha golu ruma akontese.

Jogadór Inglaterra, Anthony Gordon halai ho bola no halo pasajen badak ida ba Bellingham no halo remata iha kaixa penalidade laran, maibé guarda-rede Noruega Ørjan Nyland sei bele antesipa bola ne’e ho di’ak.

Noruega hetan golu ida iha minutu 55 liuhosi bola kantu, maibé hafoin revizaun VAR árbitru anula hikas golu tanba Erling Haaland komete ona falta ida hasoru Elliot Anderson antes marka golu.

Nune’e laiha ekipa ida maka bele hetan vitória iha tempu normál, hodi obriga jogu ba tempu adisionál.

Tama ba tempu adisionál, Inglaterra ikusmai lidera iha inísiu jogu liu husi Jude Bellingham iha minutu 93 hodi muda score ba 2-1.

Three Lions hetan penalidade iha minutu 96 hafoin Oscar Bobb hamonu Eberechi Eze iha kaixa penalidade, maibé desizaun ne’e hetan anulasaun hafoin revizaun VAR nian.

Noruega tenta atu halo empata iha tempu restu, maibé defeza Inglaterra nian mantein solidu no asegura vitóri ne’ehodi hakatba meia-finál.

 Jornalista: David Gonçalves/Editór: Vito Salvadór