Santa-Cruz F.C Manán Coração F.C 4-0 iha Jogu Kontinuasaun Liga Timorense Jornada da-Neen

Santa-Cruz F.C vs Coração F.C iha jogu kontinuasaun Liga Timorense Jornada da-neen, Sesta 10 Jullu 2026.

Díli, 11 Jullu 2026 (RAFA.TL) – Ekipa Santa-Cruz F.C kontinua rekolla vitória iha Liga Timorense Primeira Divizaun époka 2026, hafoin manán nia adversáriu Coração F.C ho score 4-0,  iha Estádiu Munisipal Díli, Sesta-ne’e.

Jogu entre ekipa rua hahú ho ritmu aas, no iha minutu lima deit Santa-Cruz F.C halo ona ameasa dahuluk liuhusi Mario Quintão ne’ebé lori bola tama ba área penalidade Coração F.C hodi halo sutu direita, maibé bola sei kona deit baliza nia rin.

Ekipa rua ne’e kontinua halo atake ba malu, maibé Santa-Cruz F.C aproveita oportunidade ho másimu hodi lansa golu dahuluk iha minutu 32 liu husi kabesada Miguel Silva hodi muda score ba 1-0.

Kontinua ba iha minutu 39, Snata-Cruz F.C aumenta tan golu ida liu husi jogadór Mario Quintão hodi muda score ba 2-0.

Golu ne’e halo ekipa Santa-Cruz F.C mantein nia superioridade hodi lansa atake barak liután ba nia adversáriu  Cocação, maibé to’o intervallu score mantein 2-0.

Tama ba segunda parte, Coração F.C hahú halo tranzisaun no muda ritmu jogu hodi aproveita oportunidade sira atu halo golu, maibé sei falla.

Tama ba minitu 58, Coração F.C tenke joga de’it ho jogadór na’in-10 hafoin Rosalino de Deus simu kartaun mean direta hafoin halo falta hasoru jogadór adversáriu Santa Cruz F.C.

Santa-Cruz F.C aproveita oportunidade ne’ebé iha no hetan auto golu ida iha minutu 84 liu husi jogadór Januario Pinto hodi muda score ba 3-0.

Ho auto golu ne’e halo Coração F.C falla kedas atu halo antesipasaun ba jogu adversáriu nian no ikus mai iha tempu estra 90+1 Santa-Cruz F.C marka tan golu ida liu husi Juvito Moniz hodi hasae score ba 4-0.

Ho rezultadu ne’e, Santa-Cruz F.C tur iha pozisaun daruak tabela klasifikasaun provisóriu Liga Timorense époka 2026 ho pontu 14 no Coração F.C okupa pozisaun da-hitu ho pontu neen.

 Jornalista: Marito da Costa/Editór: Vito Salvadór