Liga Timorense, DIT F.C Halakon Assalam FC ho Score 3-0

Jogadór sira DIT F.C nian selebra vitória.

Díli, 11 Jullu 2026 (RAFA.TL) – DIT F.C susesu rekolla pontu tolu hafoin halakon adversáriu Assalam F.C ho score 3-0 iha jogu kontinuasaun Liga Timorense Primeira Divizaun époka 2026 jornada da-neen iha Estádiu MunisipálDíli, Sesta-ne’e.

Bainhira jogu hahú ekipa DIT F.C halo kedas jogu agresivu no domina bola hodi fó presaun ba Assalam F.C, maibé ekipa Assalam F.C kontinua kalma no halo jogu ho ritmu badak hodi hein oportunidade.

Assalam F.C lansa kedas kontra atake lais liu husi jogadór Bonarudin Amin iha minutu 20, maibé guarda rede DIT F.C sei bele antesipa atake ne’e no salva bola ho di’ak.

Ekipa DIT F.C mós halo atake liu husi kombinasaun jogadór Kouda Affo, ne’ebé simu bola husi situasaun sutu falta no halo suta maka’ás ida iha área penalidade, maibé guarda-redes Assalam F.C mós hatudu prontidaun no konsege kaer bola.

To’o  jogu primeira parte termina ekipa rua mantein ho score 0-0.

Hakat ba segunda parte, DIT F.C hasa’e kedas intensidade jogu no halo atake ba Assalam F.C. Nune’e, tama ba minutu 50 DIT F.C marka golu dahuluk liuhusi auto-golu ne’ebé komete husi defensor Assalam F.C, Rio Kato, hodi fó vantajen ba DIT FC lidera ho score 1-0.

DIT F.C kontinua aumenta tan golu ida iha minutu 63 liu husi jogadór Eufrazio Lopes hodi muda score ba 2-0.

Ho golu ne’e halo ekipa Assalam F.C hahú halo tranzisaun no muda ritmu jogu hodi halo atake maibé kontinua falla.

DIT F.C aumenta tan golu ida iha minutu 89 hodi save sira nia vitória ho score 3-0 liu husi jogadór Eufrazio Lopes hafoin simu asisténsia husi Leonardo Barros.

Ho rezultadu jogu ne’e, DIT F.C sae ba pozisaun da-neen iha tabela klasifikasaun provisóriu Liga Timorense ho pontu neen no Assalam F.C tur iha pozisaun da-ualu ho pontu lima

Jornalista: Marito da Costa/Editór: Vito Salvadór