España Hakat Ba Semi-Finál Hafoin Manán Béljika 2-1

jogadór España, Mikel Merino kontribui golu ida iha minutu 81 hodi kontribui ba vitória España kontra Béljika ho score 2-1 iha Kompa Mundiál 2026. Imajen/agenciaesporte.com

Díli, 11 Jullu 2026 (RAFA.TL)- Ekipa Selesaun Nasionál Españól hakat ba semi-finál Kopa Mundiál 2026 hafoin manán nia adversáriu Béljika ho score 2-1.

Duelu entre ekipa selesaun España ho Béljika  ne’ebé hala’o iha iha Estádiu SoFi iha Inglewood, EUA, Sábadu ne’e, España hahú jogu ho agresivu no sempre fó amesa ba selesaun Béljika.

España kontinua lansa atake no halo jogu ida ho dominasaun ba bola kuaze husi liña ba liña no halo adversáriu falla antesipa bola ho di’ak no ikus mai jogadór España Fabian Ruiz aproveita bola barullu  ne’ebé guarda rede Béljika Courtois la konsege asegura ho di’ak hodi marka golu ida no muda score ba1-0 iha minutu 30.

Béljika hahú halo kedas tranjisaun ba tátika no aproveita momentu sira ne’ebé iha hodi lansa kontra atake ne’ebé ikus mai lori dunik vantazen.

Tama ba minutu 41, Béljika halo empata ba 1-1 liu husi jogadór Charles De Ketelaere hafoin aproveita bola kruzamentu husi Timothy Castagne hodi marka golu. Ho golu ne’e halo ekipa rua empata 1-1 to’o ba intervallu.

Iha segunda parte, España hahú fali sira nia jogu ofensivu, no kontinua ameasa liuhosi tiru ida hosi Mikel Oyarzabal, maibé Courtois sei antesipa ho di’ak.

Béljika tenke halo mudansa ba guarda-rede iha minutu 71 hafoin Courtois hetan lezaun no troka hosi Senne Lammens. Ida-ne’e hanesan momentu importante ba españól atu kontinua lansa atake sira ho bola kruzamentu direita sira ba baliza.

Tama ba minutu 81, España hetan fali vantajen hafoin suta ida hosi kaixa penalidade nia oin hosi Pau Cubarsi hetan blokeiu hosi baliza Béljika Lammens no la konsege asegura bola ho di’ak, nune’e bola sai jusi liman no halo jogadór España Mikel Merino hetan oportunidade marka golu, hodi muda score 2-1.

Béljika buka oportundade atu halo empata no hetan oportunidade ida liuhosi Alexis Saelemaekers, ne’ebé konsege ultrapasa guarda-rede españól Unai Simon, maibé ninia pasajen tuirmai hetan blokeia hosi defeza Aymeric Laporte molok to’o ba Romelu Lukaku.

To’o jogu termina España kontinua lidera ho score 2-1 no ho vitória ida-ne’e halo España ba meia-finál Kopa Mundiál 2026 hodi hasoru Fransa iha Estádiu AT&T iha Arlington iha kuarta oin mai.

Jornalista: David Gonçalves/Editór: Vito Salvadór