Liga Timorense 2026, Emmanuel F.C Halakon Assalam F.C 2-1

Díli, 06 Jullu 2026 (RAFA.TL)- Ekipa Emmanuel F.C halakon nia adversáriu Assalam F.C ho score 2-1 iha jornada da-lima Liga Timorense Primera divizaun époka 2026, ne’ebe hala’o iha Estádiu Munisipál Díli, Domingu (05/07/2026).

Desde inísiu primeira parte, ekipa rua tama kedas ho ritmu aas no joga ho agresividade. Assalam F.C no Emmanuel F.C lansa kontra-atake ba malu ho intensidade aas, hodi buka dalan atu loke score no domina jogu.

Ekipa rua ne’e ho embisaun hakarak muda pozisaun iha tabela klasifikasaun ho nune’e ekipa rua lansa kontra atake ba malu hodi buka oportunidade atu marka uluk golu.

To’o minutu 30 ekipa rua sei nafatin iha balansu no halo kontra atake ba malu maibé seidauk muda score iha tabela.

Tama ba iha minutu 42, Assalam F.C konsege marka uluk golu ida hodi muda score iha tabela liu husi  jogadór estranjeiru, Rio Kyto, futebolista ho nasionalidade Japão ne’e marka golu ho salto hodi lori nia ekipa Assalam F.C lidera ho score 1-0.

Score ne’e bele dehan, la dura to’o tempu naruk tanba tama ba iha minutu 45+2 Emmanuel F.C konsege responde golu ida liu husi jogadór Jonata Pereira hodi muda score ba 1-1 no ekipa rua ba intervallu ho pontu hanesan.

Tama ba segunda parte, tensi jogu komesa manas liután. Ekipa rua halo substituisaun no kontinua lansa kontra atake ba malu ho determinasaun boot.

Assalam F.C no Emmanuel F.C buka oportunidade atu marka golu tan hodi asegura pontu másimu, maibé ekipa rua ne’e sei iha forsa hanesan no kuaze laiha ida mak marka golu uluk hodi asegura vitória.

Ekipa Emmanuel F.C tenta nafatin aproveita kontra atake lais sira ,maibé seidauk bele marka golu tamba jogadór Assalam F.C sira mantein disiplina no halo jogu iha liña kotuk ho metin.

Golu segundu ba Emmanuel F.C ikus mai akontense iha minutu 90+5 liu husi nia jogadór, Mighael Adoghe, hodi muda score ba 2-1 no asegura vitóri dramátika ba Emmanuel F.C.

Ho rezulatadu vitória Emmanuel F.C ne’e hatuur ekipa Emmanuel F.C ba pozisaun da tolu ho pontus 10 husi jogu lima manan dala tolu, empata ida no derota ida. Enkuantu ekipa Assalam F.C tun ba iha pozisaun da-neen ho pontus lima husi jogu lima manan ida, empata rua no derota rua.

Jornalista: Davilio Valdemir/Editór: Vito Salvadór