Ramos-Horta husu “Maromak Nia Bensaun” Atu Cabo Verde Manán Arjentina ho Messi

PR Ramos-Horta ho koslok haksoit no foti liman-rua bainhira ekipa Cabo Verde lansa golu ida ba rede Arjentina hodi muda score provizóriu 1-1.

Díli, 04 jullu 2026 (RAFA.TL) – Prezidente Repúblika (PR), José Ramos-Horta, ne’ebé hetan entrevista hosi NTV, durante jogu Cabo Verde hasoru Arjentina, Sábadu-dadeer (4/7/2026), repete ninia apoiu públiku ba “Tubaraun Azul” no prevee rezultadu tiru penalidade, “ho Maromak nia bensaun”, hodi favorese vitóri ba ekipa Cabo Verde.

Xefe Estadu Timoroan ne’ebé sai viral hafoin deklara públikamente hanesan apoiante Cabo Verde nian iha publikasaun ida iha Facebook ne’ebé nia admiti katak eskolla ne’e “bele kusta nia iha eleisaun tuirmai” – destaka dala ida tan relasaun besik entre Timor-Leste ho arkipélagu luzófonu.

Ramos-Horta nota katak Cabo Verde ho populasaun besik 530,000 iha uma no liu millaun ida iha diáspora iha Amérika no Europa – to’o ona iha Tasa Mundiál 2026 no konsege empata hasoru España iha faze grupu nian.

“Ida ne’e hatudu katak nasaun ida bele ki’ik no kiak, maibé kuandu iha orgullu, determinasaun, no ambisaun, nia mós bele manán”, hateten Prezidente Repúblika José Ramos-Horta.

Prezidente mós hanoin hikas onda boa vontade nian ne’ebé hamosu hosi nia komentáriu sira, ne’ebé sai viral iha Arjentina, hodi halo mídia lokál sira – inklui estasaun rádiu ida ne’ebé importante liu iha nasaun – atu kontaktu diretamente ho nia.

“Arjentinu sira kontente rona ha’u hatete buat sira ne’e”, nia hatete no hatutan katak espozisaun hosi mídia sira hasa’e mós perfil Timor-Leste nian.

Iha entrevista, Ramos-Horta halo paralelu ida entre Cabo Verde ho Timor-Leste “nasaun ki’ik sira ne’ebé ko’alia lian portugés, maibé ho diáspora boot sira” hodi defende katak desportu bele sai hanesan instrumentu ida ba vizibilidade diplomátiku ba nasaun sira ne’e. Nia mós aproveita hodi halo advokasia ba investimentu ne’ebé boot liu iha desportu timoroan nian, hodi sita potensiál juventude nasaun nian iha dixiplina sira hanesan jinástika rítmika, trampolin, arte marsiál, taekwondo, no maratona, no mós futeból, basketebol, no voleibol.

Bainhira husu kona-ba rezultadu jogu nian, Prezidente halo predisaun ida, “Bele remata ho 1-1. Cabo Verde sei marka nafatin golu ida. Iha faze ida-ne’e, labele remata ho empata; sei tenke deside ho penalidade sira.”

Ramos-Horta mós ho komiku husu ba intervensaun divina hodi ekipa kabu-verdianu nia naran, haree ba estatutu Arjentina nian hanesan favoritu.

“Ha’u husu de’it ba Maromak – maski Maromak ladún interfere iha futeból – atu ajuda Cabo Verde. Arjentina manán dala barak ona. Atu Maromak nia bensaun – maski dala ida de’it – sai bensaun boot ida ba Cabo Verde atu manán.” Tenik Ramos-Horta.

Nia hakotu entrevista ho lian haksolok: “Viva Cabo Verde! Cabo Verde sei manán!”

Jornalista: Marito da Costa