Suísa Halakon Arjélia 2-0 Hodi Avansa Ba Jornada 16 Kopa Mundiál

Suisa halakon ho fasil Arjélia hodi hakat ba jornada 16 ho score 2-0 iha Kopa Mundiál 2026. Imajen/FIFA

Díli, 03 Jullu 2026 (RAFA.TL)- Ekipa selesaun nasionál Suísa susesu  assegura  billete ida hafoin halakon Arjélia ho score 2-0 iha faze eliminatóriu hodi avansa ba Jornada 16 Kopa Mundiál 2026.

Jogu entre ekipa rua ne’ebé halai iha estadium BC Place, Vancouver, Sesta (03/07/2026), Suísa no Arjélia halo jogu ida ho ritmu lais no intensidade as, no ekipa rua ne’e buka kedas atu halo presaun ba malu desde jogu tama ba minutu lima ba leten.

Suísa halo jogu ida lais ho atake sira ne’ebé perigu. Nune´e, lidera uluk iha minutu 10 liu husi golu Breel Embolo hafoin aproveita bola pasajen husi Johan Manzambi.

Arjélia luta maka’ás iha jogu; Riyad Mahrez ho nia kolega sira kuaze laiha ameasa sériu iha primeira parte tomak maske domina jogu iha liña klaran maibé adversáriu la fó oportunidade atu Arjéli lansa amiasa sira ne’ebé seriu.

Iha minutu sira ikus nian, Arjélia kria oportunidade ida liuhosi Ibrahim Maza, maibé nia esforsu sai dook hosi baliza Suísa nian no score 1-0 mantein to’o intervalu.

Bainhira hahú jogu segunda parte nian, Suísa aproveita oportunidade hodi aumenta kedas golu, no jogadór  Dan Ndoye marka golu iha minutu 46 hafoin aproveita bola ne’ebé iha no lansa kedas sutu ida iha area penalidade nian hodi muda score ba 2-0.

Arjélia tenta atu hatán no lansa mos kontra atake Iha minutu 50, Riyad Mahrez iha oportunidade atu marka golu hafoin halo ligasaun ho pasajen ida hosi Rafik Belghali, maibé nia tentativa hetan blokeiu hosi defeza suisu nian.

Suísa, domina atake, ameasa fali iha minutu 57 liu husi jogadór Ruben Vargas hafoin hetan pasajen no lansa sutu direita maibé bola sei kona pose baliza nian no sai dook husi alvu.

Ho presaun konstante, Arjélia halo substituisaun rua, ida ne’ebé envolve hasai médiu ofensivu Houssem Aouar no Mudansa tátika fó impaktu uitoan de’it, no Arjélia hetan nafatin presaun hosi Suísa.

Ekipa rua mantein halo kontra atake ba malu.  Laiha golu ruma akontese to’o apitu ikus nian lian no Suísa mantein vitória ne´e ho score 2-0.

Rezultadu  jogu ne’e halo Suísa avansa ba Jornada 16 Kopa Mundiál 2026, hodi hein vensedór hosi jogu entre Kolómbia no Gana. Entretantu, Arjélia sai hanesan nasaun afrikanu dalimak ne’ebé maka eliminadu iha jornada 32, hamutuk ho Áfrika-Súl, Senegal, Kosta Marfim, no Repúblika Demokrátika Kongo.

Jornalista: David Gonçalves/Editór: Vito Salvadór