Uma-Nain Estadus Unidus Amérika Avansa Ba Jornada 16 Hafoin Halakon Bósnia Herzegovina 2-0

Jogu EUA vs Bósnia Herzegovina. Imajen/FIFA

Díli, 02 Jullu 2026 (RAFA.TL)- Ekipa uma-nain Estadus Unidus Amerika (EUA), ho susesu hakat ba jornada 16 hafoin halakon adversáriu Bósnia  Herzegovina ho score 2-0, iha jogu ne´ebé halao iha Estádiu Levi’s, Santa Clara, Califórnia, Kinta (02/07/2026).

Estadus Unidus Amérika asegura fatin ida iha jornada 16 liu husi golu sira Folarin Balogun ho Malik Tillman iha primeira no segunda parte jogu minutu 90 nia laran.

Estadus Unidus hahú jogu ne’e ho di’ak bainhira Christian Pulisic lansa ona ameasa iha minutu dahaat, maibé nia suta hetan blokeiu hosi defeza Bósnia.

Iha minutu daneen, Bósnia lansa kontra atake ho kombinasaun atakante na’in rua, Edin Dzeko simu bola depois remata husi Ermedin Demirovic ho suta ida ne’ebé maka’as. Infelizmente, guarda-rede Matthew Freese alerta tebes hodi salva avansadu Stuttgart nia suta.

Adeptu sira iha Estádiu Levi’s haksolok maka’as iha minutu 30 bainhira jogadór avansadu Estadus Unidus Folarin Balogun marka golu ida, maibé golu ne´e anula direita husi arbitu tanba Balogun iha pozisaun offside.

Tama ba minutu ikus primeira parte, Folarin Balogun konsege muda tabela score ho golu ne´ebé nia marka iha minutu 45 hodi muda score ba 1-0 molok ba intervallu.

Kontinua ba segunda parte, Estadus Unidu iha tan oportunidade atu marka golu daruak iha minutu 50 maibé adversáriu sei solidu hodi halo bleiu ba atake sira neébé Estadus Unidus halo.

Tama ba minutu 64, jogadór Estadus Unidus Balogun tenke sofre kartaun mean diretu hosi árbitru Raphael Claus tanba falta ida hasoru Tarik Muharemovic ne´ebé konsideradu iha risku ba jogadór adversariu ne´e nia kondisaun fiziku.

Ho vantajen ne´ebé iha, Treinadór Bósnia, Sergej Barbarez halo kedas substituisaun hodi hatama jogadór ofensivu na’in-rua, Amar Memic no Haris Tabakovic, hodi troka Nikola Katic no Sead Kolasinac. Infelizmente, movimentu ida-ne’e la fo influensia signifikativamente ba Bósnia nia jogu. No Estadus Unidus aumenta tan sira nia golu ida liu husi bola falta iha minutu 82 ne´ebé ezekuta husi Malik Tillman no bola ne´e tama direita ba baliza no muda score iha tabela ba 2-0. Too tyempu remata Estadus Unidus kontinua lidera iha tabela score no rekolla vitória importante ba faze tuir mai.

Ho vitória ne’e lori signifikasaun boot ba nasaun tolu ne’ebé maka sai uma-na’in ba Kopa Mundiál 2026 tanba sira avansa hotu ba jornada 16, hafoin Kanadá manán Áfrika-Súl ho score 1-0, tuir fali Méxiku, ne’ebé maka manán Ekuadór ho 2-0.

Iha jornada 16, Estadus Unidus Amérika sei hasoru Béljika ne’ebé antes ne´e manán adversáriu Senegal ho score 3-2, no jogu entre ekipa rua sei halao iha Estadium Lumen iha Seattle, Washington, Tersa (07/07/2026).

Jornalista: Davilio Valdemir/Editór: Vito Salvadór