Harry Kane Lori Inglaterra Asegura Vitória Dramátiku hasoru Kongo no Avansa Ba Jornada 16 Kopa Mundiál 2026

Harry Kane. Imajen/Reuters

Díli, 02 Jullu 2026 (RAFA.TL)- Ekipa nasionál Inglaterra avansa ba Jornada 16 Kopa Mundiál 2026 hafoin jogadór estrella Herry Kane marka Brace ba nia ekipa hodi asegura vitória dramátiku ho score 2-1 kontra RD Kongo, iha Estádiu Atlanta, EUA, Kinta (02/07/2026).

RD Kongo halo jogu ida ho kuidadu no lansa uluk atake ida ba Inglaterre no marka golu iha minutu hitu liu husi Brian Cipenga hafoin simu pasajen naruk ida hosi Chancel Mbemba.

Brian Cipenga lansa suta ida ba poste besik ne’ebé la asegura husi guarda rede Inglaterra Jordan Pickford, nune’e RD Kongo lidera uluk ho score 1-0.

Ekipa Inglaterra  tenta atu kontrola jogu, maibé atake sira dala barak sei falla tanba defeza adversáriu fasil atu kontrola.

Inglaterra iha oportunidade dahuluk mai hosi situasaun set-piece ida no Declan Rice nia suta livre kona deit jogadór adversáriu Ezri Konsa molok sai ba liur.

Inglaterra aumenta presaun ba RD Kongo no Marcus Rashford besik atu halo empata ho kabesa ida ne’ebé maka Lionel Mpasi hapara. Rashford iha tan oportunidade osan-mean ida iha minutu 34, maibé nia suta hetan blokeiu husi Aaron Wan-Bissaka direita iha liña baliza.

Kongo kuaze aumenta golu iha minutu 44 liuhosi kabesa ida hosi Yoane Wissa ne’ebé kona poste. Entretantu, Mpasi halo dezempeñu ne’ebé maka’as, hodi salva kabesa sira hosi Jude Bellingham no suta sira hosi Harry Kane, no score 1-0 mantein too intervallu.

Iha segunda parte, Inglatera aumenta kedas nia intensidade atake. Rashford ameasa iha minutu 48, enkuantu Mpasi halo tan salvasaun krusiál ida, hodi hapara bola ida ne’ebé maka desvia ba nia baliza hosi Aaron Wan-Bissaka.

Tuchel halo substituisaun krusiál sira, hodi lori Anthony Gordon no Bukayo Saka hodi troka Rashford no Noni Madueke. Mudansa sira fó rezultadu; Ikus mai Inglaterra halo empata iha minutu 75 liu husi golu Herry Kane hafpoin simu pasajen husi Gordon nia kruzamentu.

Tama ba minutu 86 Inglaterra marka tan golu daruak liu husi Harry Kane hodi muda score ba 2-1.

Ho golu daruak husi kapitaun Inglaterra Hary Kane nian asegura vitória ba Inglaterra no hakat ba jornada 16.

Iha jornada 16, Inglaterra sei hasoru Méxiku ne´ebé antes ne´e asegura ona nia fatin iha jornada 16 hafoin halakon nia adversáriu Ekuadór iha faze eliminatpriu ho score 2-0.

Jornalista: David Gonçalves/Editór: Vito Salvadór